Meclis liderleri “Birlik” qırımtatar litseyiniñ talebelerinen körüştiler

23 February 2025

Qırımtatar Milliy Meclisiniñ reisi Refat Çubarov ve onıñ birinci muavini Nariman Celâl “Birlik” qırımtatar litseyiniñ talebeleri ve Kıyiv vilâyetiniñ başqa mektepleriniñ talebelerinen körüştiler. Körüşüvde jurnalist ve ruhiyatçı Mavile Halil de iştirak etti. Körüşüv er yıl kiçik aynıñ 26-nda qayd etilgen Qırım işğaline muqavemet kününe bağışlandı.

2014 senesi mektep talebeleriniñ çoqusı ya bala edi ve Qırımnı pek yahşı hatırlamay edi, ya da işğalden soñ doğdı ve iç bir vaqıt anda barmağan edi. Bu sebepten çıqışta bulunğanlar sürgünlik yerlerinde keçken balalıqları aqqında, Qırımğa qaytqan soñ ilk hatıraları aqqında ikâye etip başladılar.

“Anam er gece yatmazdan evel bizge dağlar, özenler, yeşil ağaçlar, orman ayvanları aqqında ikâye ete edi. Men Qırımnı Cennet dep sayğan edim. Anam er vaqıt evge qaytaracağımıznı ayta edi”, – dep Refat Çubarov tarif etti.

Spikerler işğal, muqavemet, Qırımdaki repressiyalar aqqında tarif ettiler. Mektep talebeleri kiçik aynıñ 26-ndaki mitingniñ ve ondan soñ 2014 senesi kiçik-saban aylarındaki vaqialarnıñ areketlerini nasıl idare etkenleri, Qırımda yaşamağa devam etken qırımtatarlarnıñ aqlarını nasıl qorçalağanları, esirlikte ve apiste bulunğan qırımtatarlarğa nisbeten munasebet nasıl olğanı ve ilâhrenen meraqlana ediler.

Meclisniñ reisi qayd etti ki, balalar bile öz halqı içün faydalı bir şey yapa bileler – şimdi olarnıñ eñ müim vazifesi qırımtatar tili, medeniyeti, tarihı ve ananelerini ögrenmektir.