Qırımtatar halqı Ukrayina milliy toplulıqları ve tamır halqları forumında iştirak etti

22.05.2026

Mayısnıñ 21-nde Kıyivde Ukrayina milliy toplulıqları ve tamır halqları forumı olıp keçti. Forumnı Ukrayina qavmiy-siyasiy ve vicdan serbestligi devlet hızmeti teşkil etti. Tedbirde Ukryaina milliy toplulıqları ve tamır halqları, devlet müessiseleri ve devlet akimiyet organları, din erbapları, diplomatik missiyalar ve cemaat teşkilâtlarınıñ vekilleri iştirak ettiler.

Forumda Qırımtatar halqını Qırımtatar Milliy Meclisiniñ azaları Refat Çubarov, İlmi Umerov, Eskender Bariyev, Riza Şevkiyev ve Gülnara Bekirova, em de qırımtatar cemaat teşebbüsleri, teşkilâtları ve ayrı faalciler temsil ettiler. Tedbir musafirleri içün qırımtatarlarnıñ medeniyeti ve yaşayışına bağışlanğan stend taqdim etildi. Ziyaretçiler ananeviy qırımtatar tatlıları ve pişken ötmegi, qavenen, ananeviy turmuş eşyalarınen, em de halqnıñ tarihı ve medeniy mirasını aks etken arhiv resimlerinen tanış ola bildiler.

Forum çerçivesinde Qırımtatar Milliy Meclisiniñ azaları Ukrayina halqlarınıñ hatıra, birlik ve umumiy keleceginiñ timsali olaraq Milletlerara razılıq bağçasında alma tereklerini oturttılar.

Forum devamında Qırımtatar Milliy Meclisiniñ Reisi Refat Çubarov çıqışta bulunıp, çoqmilletli ukrayin cemiyetinde qarşılıqlı ürmet ve musaviylikniñ müimligini qayd etti.

“Birlik – bu memlekette er kesniñ musaviy aqları, devletni musaviy qorçalavı ve cemiyette er kesniñ medeniyeti, tili ve ananelerine musaviy diqqat kösterüvidir. Özüni ve başqalarnı ürmet etmek müimdir”, – dep Refat Çubarov qayd etti.

Forumnıñ kontsert qısmında Ukrayina halq artisti Femiy Mustafayev, USQniñ yır ve oyun ansambliniñ solisti İsmail Qurt-Umer ve genç yırcı Meryem Mambetova iştirak ettiler. Olarnıñ çıqışları forumnıñ medeniy programmasınıñ müim bir parçası oldılar ve zemaneviy Ukrayinada qırımtatar medeniyetiniñ zenginligi ve canlı barlığı aqqında hatırlattılar.

Tedbirniñ timsali qırımtatar göñüllileri Ayder Malla, Murat Madgaziyev ve Elvira Emirovanıñ Ukrayina Prezidentiniñ “Ukrayinanıñ mudafaası içün” nişanınen taqdirlenmesi oldı. Qırımtatar göñüllileriniñ mukâfatlandırılması olarnıñ işi, ukrayin cemiyetine qol tutuvı ve Ukrayinanıñ umumiy küreşine qoşqan issesi içün minnetdarlıq belgisi oldı.

Forumnıñ müim qısmı, elâk olğan ukrayin askerleriniñ resimleri taqdim etilgen Hatıra soqağınıñ açılması oldı. Olarnıñ arasında 18 qırımtatar bar, olar Ukrayinanı qorçalap, canlarını feda ettiler. Tedbirniñ bu qısmı azatlıqnıñ yüksek fiyatı ve Ukrayina halqınıñ mustaqilligi ve devletniñ kelecegi içün umumiy küreşi aqqında hatırlatma oldı.