Kıyivde “Putinniñ kerçek mabüsleri. Esir etilgen halqlarnıñ siyasiy mabüsleri” uquq qorçalayıcı leyhası taqdim etildi

15 Noyabr 2024

_{Foto: Milletlerniñ İmperatorlıqqa qarşı blokı}

Kıyivde Milletlerniñ İmperatorlıqqa qarşı Blokı “Putinniñ kerçek mabüsleri. Esir halqlarnıñ siyasiy mabüsleri” adlı halqara uquq qorçalayıcı leyhanı taqdim etti.

– Bular, Putin rejiminiñ tarafından taqip etilgen faalciler, uquq qorçalayıcılar ve öz halqınıñ mustaqilligi içün küreşkenler. Olarnıñ er biri öz inançları içün azatlıqtan marum etildi. Sergi, sizni lâqayd qaldırmaycaq aqiqat ve adalet oğrunda küreşniñ kerçek ikâyelerini kösterecek. Olarnıñ adları bütün dünyada eşitilmeli ki, bu adaletsizlik unutılmasın. Siyasiy mabüslerge qoltutmaq ve olarnıñ azat etilmesi içün küreşmek kerekmiz!”, – dep qayd eteler teşkilâtçılar.

Leyhanıñ taqdim merasiminde Qırımtatar Milliy Meclisiniñ reisiniñ muavini Nariman Celâl çıqışta bulunıp, siyasiy mabüsler daima yardımğa muhtac olğanlarını qayd etti.

– Siyasiy mabüsler bizim adiy insan diqqatımızğa muhtaclar: mektüpler, posıkalar, qorantanen körüşüvler. Pek çoq insan, hususan bizim qırım siyasiy mabüslerimiz, Herson ve Luğansk vilâyetlerinden uzaq mesafelerge alıp ketile, bu biñlernen kilometr, olarnı aşmaq içün tuvğanlarına tek para ve bunı nasıl yapmaq mümkün olğanı aqqında logistika bilgisi kerek, – dep qayd etti Meclisniñ reisiniñ muavini.

Taqdim etüv vaqtında aynı adlı mevzulı sergi taqdim etilecek, onıñ esasında – siyasiy mabüslerniñ on ikâyesi – esir halqlarnıñ milliy-azatlıq areketleriniñ faalcileri, em de eki qırımtatar siyasiy mabüsiniñ ikâyeleri.

– Olar episi Ukrainağa işanalar, çünki Ukraina bugün imperiyağa qarşı nasıl küreşmek kerek olğanını köstere, başını egmey, silâ alıp, yalıñız öz serbestligi içün küreşmek degil de, em de esir etilgen halqlarğa ümüt bermek kerek olğanını köstere. Bizim ortaq bir duşmanımız bar, ve biz küçlü devletlernen em de küçsüz ve esir halqlarınen beraber çalışmaq kerekmiz, olar da bizge yarın normal qomşularnı temin etmege yardım ete bileler. Biz Rusiyeniñ böyle sağlam quvetleri olması içün çalışmalımız, bundan soñ olar bizge bir daa ücüm, tecavuz olmaycağını kefil eterler. Bunıñ nasıl olacağı epimizge bağlıdır”, – dedi Nariman Celâl.