İşğalcilerniñ vazifesi, tamır qırımtatar halqınıñ özdeşligini yoq etmektir — Qırım platformasında Çubarov

24 Oktâbr 2023

Şu anda işğal etilgen Qırımda sahte ve siyasiy sebepli davalarğa mücibi 123-ü qırımtatar vekilleri olğan eñ az 189 Ukraina vatanadaşı apis etildi. İşğalcilerniñ maqsadı, tamır qırımtatar halqını yoq etmek ve onı Qırımdan tamamınen çıqarmaqtır.

Qırım sammiti ekinci parlament sammitinde Qırımtatar Milliy Meclisiniñ başı Refat Çubarov, bu aqqında haber berdi.

“Rus işğalcileriniñ vazifesi, tamır qırımtatar halqını yoq etmek ve onı Qırımdan tamamınen çıqarmaqtır. Bu maqsatqa eñ tez şekilde irişmek içün eusiye federatsiyası, qırımtatar halqına qarşı repressiyalar ve taqiplerden ğayrı, Qırımda öz vatandaşlarını tezce yerleştirir. Qırımda endi milliondan çoq bu tür insan yaşay”, – dep bildirdi o.

Çubarovnıñ sözlerine köre, Yosıp Stalin ve sovet rejiminiñ başlağanı qırımtatar halqını soñuna yoq etüv ceryanını bitirmek içün rus diktatorı Volodımır Putin Qırımnı zapt etti. 

“Rusiye Federatsiyası tarafından işğal etilgen Qırım bugün – mecburiy tutulmalar ve insanlarnıñ ğayıp olmaları, siyasiy sebepli taqipler ve serbestlikten marum etüv, azaplar ve şiidetli areketler, insanlarnıñ başqa esas aq-uquqlarını bozmalardır”, – dep qoştı o.

Çubarov qayd etti ki, Meclisniñ nazar noqtası böyle: Qırımda ve işğal etilgen başqa ukrain topraqlarında yerleşken bütün ecnebiyler ve vatandaşlıqqa saip olmağan insanlar, añlı tarzda cinayet yaptılar, “olar, hırsızlanğan şeylerni almağa kelgen namussız insanlarday”, bunıñ içün işğal etilgen topraqlardan acelen ketmeliler.

“Qırım yarımadası, Ukrainanıñ ayırılmaz toprağıdır, onıñ toprağında teşkil etilgen Qırım Muhtar Cumhuriyeti ve Aqyar, Ukraina Qanunnamesine mücibi salâhiyet yapacaq milliy-topraq muhtariyetine deñiştirilmelidir”, – dep ayttı o.

Meclisniñ başınıñ bildirgenine köre, milliy-topraq muhtariyeti:

• Ukrainanıñ topraq bütünliginiñ bozulmaması;
• tamır qırımtatar halqınıñ öz-özüni identifikatsiya aqqını yerine ketirmesi;
• insan ve vatandaşnıñ teñ aq-uquqları;
• Qırımnıñ muntazam inkişafını temin etecektir.