İşğalcilerniñ tutqanları Ahayev ağaları azat etildi

20 Dekabr 2022

Rus quvetçileri, dekabr ayınıñ 19-ında saba maalinde tutulğan Ernest ve Marlen Ahayevni azat ettiler. “Qırım birdemligi” içtimaiy birleşmesi bunı bildirdi, dep Qırım.Aqiqat haber berdi.

Faalcilerniñ bilgilerine köre, şimdi ağalar dostları ve aqrabalarınen beraber Turgenevo köyündeki evine keteler.

– Bütün kün faalcilerniñ ne yerde ve olarnen ne olğanı aqqında malümat yaqın kelecekte belli olacaq, – dep “Qırım birdemligi” bildirdi.

Keçenlerde advokat Lilâ Gemeci, quvetçilerniñ Ernest ve Marlen Ahayevni azaplaya bilgeninden qorularını bildirdi. Tutulğanlarnıñ erkek qardaşı Amet bildirdi ki, tintüvler vaqtında alınğan telefonlarnıñ geolokatsiyasını ögrene bildi – Canköydeki Rusiye FSB binasını kösterdi. 

Dekabr ayınıñ 19-ında saba maalinde Qırımdaki Canköy rayonınıñ Medvedivka köyünde quvetçiler, mezkür köyde yaşağan qırımtatarlarnıñ evlerini tinttiler. Bundan biraz vaqıt keçken soñ Ernest ve Marlen Ahayevniñ tutulmaları belli oldı. Erkek qardaşı Amet tutulmadı.