İşğalciler, tutulıp habersiz yerge ketirilgen Hersonlı faalcini Aqmescitteki yañı taqiqatçı izolâtorına ketirdiler

15 Noyabr 2022

Mayıs ayında tutulıp habersiz yerge ketirilgen Hersonlı faalci İrına Horobtsova Aqmescitteki yañı taqiqatçı izolâtorına ketirildi. Kamerada onen beraber daa eki qadın tutula.

Qırım uquq qorçalayıcı gruppası bu aqqında haber berdi.

– QUGnıñ monitorınıñ malümatına köre, keçenlerde SİZO-2ge daa bir qaç on kişi ketirildi: şimdi anda eñ az 110 kişi tutula, – dep beyanatta yazıldı.

QUG hatırlattı ki, oktâbr ayınıñ soñunda Aqmescit şeerinde – №1 şiddetli rejimdeki tüzetme müstemlekesiniñ toprağında – işğalciler yañı taqiqatçı izolâtorını (SİZO) açtılar. Bundan evel Qırımda tahminen yedi yüz kişini yerleştire bilgen tek bir izolâtor bar edi. Soñ vaqıtlarda o taşırıldı.

Mayıs ayında tutulıp habersiz yerge ketirilgen faalci İrına Horobtsova eñ az mayıs ayınıñ 25-inden berli Aqmescit şeeriniñ SİZO-1da tutula edi.