İşğalciler “Hizb ut-Tahir davası”nıñ ekinci Aqmescit gruppasınıñ ükümini deñiştirmemege qarar berdiler

02 Fevral 2024

Vlasihadaki Rusiye Apellâtsiya arbiy makemesi, Cenübiy bölge arbiy makemesiniñ “Qırım birdemligi”niñ faaliclerine,13 ve 14 senege maküm etilgen “Hizb ut-Tahir davası”nıñ ekinci Aqmescit gruppasınıñ beş iştirakçisine dair ükümini deñiştirmemege qarar berdi.

“Qırım birdemligi”ne tefsir etkende advokat Lilâ Gemeci bu aqqında haber berdi, dep Suspilne bildirdi.

Enver Ametov, Osman Arifmemetov, Ruslan Süleymanov, Rustem Şeyhaliyev ve Yaşar Muedinovnı birinciden apishanelerde, bundan soñ Rusiyedeki sert rejimli müstemlekelerge etap etecekler.

Onıñ sözlerine köre, birinci seviyeli makeme ve Apellâtsiya makemesiniñ oturışlarında qorçalayıcı taraf, “Qırım birdemligi”niñ faalcilerine berilgen qabaatlarnıñ sebepsizligini isbatlamağa tırıştı. Kerçekten de tahallüsnen söz aytqan davanıñ şaatları siyasiy mabüslernen tanış olmadılar, fonografik ve til-diniy araştırmalar “imkânsız” edi. Faqat Apellâtsiya makemesi, bu delillerni eşitmemege qarar berdi ve ükümni “sebepli ve qanuniy” tanıdı.

“Biz bunun razı degilmiz ve bütün vaqıt devamında bizim oğlanlarımız, küreşinde tek silânıñ söz olğanını isbatlamağa tırışa ediler. Ve bu sözler, olarnı eşitken ve diñlegen er biriniñ göñlüni toqudı. Ve bu, eñ küçlü silâdır. Bugünki oturışnıñ soñunda aytmağa ister edim ki, adamlar ser rejimli müstemlekege 13 ve 15 senege maküm etildi. Birinci dört sene olar apishanede keçirmeliler. Yani olarnıñ sözleri sebebinden olarnı apishanede cinaiy masüliyetke çekeler”, — dep Gemeci qayd etti.

Osman Arifmemetov söz aytqanda, qabaatlağan tarafnıñ delillerni tanımayıp qayd etti ki, deliller bazasındaki qaba bozmalarğa baqmadan makeme, davanıñ iştirakçilerine peşin fikirini bildirdi.

“Rusiyede başqa fikirlerde qarşı cenk ceetinde bizni fikir cinayetinde qabaatlaylar. Makeme sisteması ise, akimiyetniñ fikirlerinden farqlı olğan fikirlerni yoq etici alet oldı”, — dep qayd etti o.

Aynı zamanda Yaşar Muedinov söz aytqanda Qırımda repressiyalarnı toqtatmağa çağııp bildirdi ki, “qara gece maalinden soñ er vaqıt saba kele”.