İçtimaiy jurnalist İrına Danılovıç açlıq bitidir

06 Aprel 2023

Danılovıçqa advokatınen körüşmege izin berdiler ve tedaviylev bermege söz berdiler.

Çiçek ayınıñ 6-sında babası Bronislav Danılovıç bunı Qırım.Aqiqatnıñ mühbirine añlattı.

– İrına, tedaviylev almaq içün açlıq bitirdi. Bugün onı hastahanege tibbiy teşkerüvge ketirmege söz berdiler, amma qaysı hastahanege ketireceklerini aytmadılar, – dep o qayd etti.

Jurnalistniñ babasınıñ sözlerine köre, Çarşenbe künü Danılovıçnıñ advokatı onen körüşe bildi. Qorçalayıcınıñ sözlerine köre, İrınanıñ alı «pek yahşı degil», keçkende kibi o, qulaq acısına, baş aylanuvğa ve baş ağrısına şikâyet ete.

Cumartesi künü Bronislav Danılovıç qızınen körüşmege planlaştıra – oña SİZOda körüşmege izin berdiler.

– Söz tutıp tutmaycaqlarını bilmeyim, amma aldatmaq – olarnıñ hobbisidir, – dep adam ayttı.

Saban ayınıñ 21-inde Danılovıç açlıq çekmege qarar berdi. Böylece jurnalist, Aqmescitteki SİZOda oña tibbiy yardım bermemesine qarşı narazılıq köstermege qarar berdi.