Hayser Cemilevniñ qorçalayıcısı Aleksandr Lesovoy üç atış aqqında aytmaq erte, çünki qaza yüz bergen yerde bir qurşunı tapıldı, dedi

30 Mayıs 2013

Matbuatta Hayser Cemilev mayıs 27 künü sanki üç atış yapqanı muzakere etilgeni munasebetinen Hayser Cemilevniñ advokatı Aleksandr Lesovoy üç atış aqqında aytmaq erte, çünki qaza yüz bergen yerde bir qurşun tapıldı, dedi.

“Bu obyektiv, qayd etilgen fakt, – dedi H. Cemilevniñ qorçalayıcısı. – Zararlanğan Fevzi Edemov yaralanğan vaqıtta tizleri üstünde otura edi. Şunıñ içün de kelecekte mahkeme tibbiy ekspertlerniñ hulâsalarına köre silâhtan bir qurşun ya da üç qurşun atılğanı aqqında aytmaq mümkün olur”.

Aleksandr Lesovoy emin ki, mahkeme-tibbiy ekspert öz hulâsasını yapmağance ve öz hulâsası içün qaza olğan yerniñ tarifini qullanmağance facia yüz bergen yerde yapılğan atışlarnıñ sayısı aqqında aytmaq yasaqtır.

Aleksandr Lesovoy şunı da qayd etti ki, ceset közden keçirilgende ateşli silâdan alınğan üç yara belgilendi. Merhumnıñ başı, sağ omuzı ve sağ ayağı yaralanğan.

Mayıs 27 künü Milliy Meclis reisi, Ukraina halq deputatı Mustafa Cemilevniñ küçük oğlunıñ evinde qaza yüz berdi, Hayser Cemilev muqaytsızlığı sebebinden ateşli silâdan adam öldürdi.

Facia olğan künü Mustafa Cemilev onıñ ailesi ve aqrabaları taqiqat işlerini alıp baruvda ellerinden kelgeni qadar yardım etecegini resmen bildirip, taqiqat obyektiv ve tarafsız olacağına ümüdini ifade etti.

2013 senesi mayıs 29 künü Fevzi Edemovnıñ cenazesi qılındı. Merhumnıñ ana-babasına hıtap etken Mustafa Cemilev ailesinde olğan er şeyini rahmetli Fevzi Edemovnıñ ailesinen paylaşmağa azırlığını söyledi.