Hayser Cemilevniñ ekimi: O, hapiste degil de, aqıl hastahanesinde olması kerek

30 Mayıs 2013

Qırımtatar halqınıñ lideri, millet vekili Mustafa Cemilev Fefzi Edemovnı diqqatsızlığı neticesinde öldürgen oğlu ruhiy hasta olğanı ve İstanbuldaki eñ nufuzlı klinikalarnıñ birinde tedaviylengeni aqqında defalarca söylegen soñ QHA Hayser Cemilevni tedaviylegen İstanbullı doktor Yasin Genç ile bağlandı.

QHA: Qaza yüz berdi – Hayser Cemilev adam öldürdi. Siziñce, bunıñ sebebi nede?

– Bizim hastamıznıñ zeini bozuq, kerçek hayattan uzaq edi. Biz buña psikoz deymiz. Bu hastalıqnı ilâclarnen tedaviylemek mümkün, amma tedaviylev toqtatılsa ya da ilâclar yañlış qullanılsa hastalıq qaytavlaya bilir. Psikoz şeker hastalığı kibi devamlı yani hronik hastalıqtır. İlâc qullanılması toqtağanınen hastalıq qayta, hasta vaziyetni yañlış añlaya, körebilir. O, bu hastalıqtan çekişe ve ilâc qullana edi. Bes-belli, ilâc qullanmaqnı toqtatqan ya da er zaman qullanmağanı sebebinden hastalığı qaytavladı. Böyle diagnozlı hastalar ilâc qullanmaqnı toqtattılarmı, şu vaziyet ola. Mencesine, ilâc yañlış qullanğanı sebebinden hastalıq qayttı.

QHA: Ala-azırda Hayser Cemilev hapiste tutuqlanmaqta. Böyle hastalarnı apske almaq mümkünmi?

– Onı hapiste tutmaq olmaz. İnsan bundan evel hasta olsa, onı başta közden keçirmek, baqmaq lâzim. Hayser kibi hasta insan cinayet yapsa, onı başta mıtlaqa mahkeme-psihiatrik hastahanege yollamaları kerek. Anda ekimler alını, vaziyetini ögrenip, sağlığı yerine klgenge qadar hastahanede olması kerek. Tecribe şunı köstere ki, bundan soñ o, bütün ömüri ilâc qullanacaq

QHA: Avropada, dünyada böyle adiselerge nasıl baqıla?

– Böyle allarda mahsus komissiya meydanğa ketirile. Em bir doktor degil de, bütün bir gruppa mütehassıslar test ve tedaviy keçireler. Bundan soñ belli bir müddet hastanıñ vaziyetini közetip, onıñ kerçekten de hasta ya da sağlam olğanı aqqında hulâsa çıqaralar. Ve tek soñra tibbiy qarar alına. Bu qararğa köre insanğa cinaiy mesüliet yüklemek ya da kimniñdir imayesine avale etmek qararı berile.

QHA: Şimdi onı hastahanede degil de hapiste tutuqlağanları onıñ hastalığına tesir etebilirmi?

-Hapiste o psihiatrnıñ nezareti altında bulunmalı. İlâc qullanmasını közetmek kerekler. Çünki sağlam insan bu işni yapamazdı. Böyle hastalar skeptik olaraq, zeinleri bozula. Olar kendilerine zarar eteceklerinden qorqalar. Halüsinasyonları olıp, em özleri, em etraftakilerge zarar ketirebilirler. Hapiste bulunması hastalıqnı daa ziyade beterleştirir. Zira hapis şaraitleri sağlam insanğa bile yaramay tesir ete. Hayser Cemilev hapiste bulunırken, eziyet çekecegi belli

QHA: Ne yapmaq kerek?

– Zanımca, onı aqıl hastahanesine yollamaq kerek ki, anda onı baqsınlar.

Asibe İbadullayeva
QHA