“Qırım birdemligi” cemaat areketi faaliyetini toqtatqanını bildirdi

21.07.2026

Rusiye Federatsiyası Adalet nazirligi 2026 senesi ilk yaz ayınıñ 26-nda teşkilâtnı “çetel agentleri” cedveline kirsetken soñ, “Qırım birdemligi” cemaat areketi faaliyetini toqtatqanını bildirdi.

Öz arizasında faalciler bu qararnı, on yıl devamında vaqtınca işğal etilgen Qırımda siyasiy repressiyalarnı belgilegen, siyasiy mabüslerniñ qorantalarına qoltutqan, uquqiy yardım köstergen ve halqara toplulıqqa yarımadada insan aqlarınıñ bozuluvı aqqında haber bergen mustaqil cemaat areketini itibardan tüşürmek ve izolâtsiya etmek içün yapılğan siyasiy sebeplerge esaslanğan basqı aktı dep adlandırdılar.

Areket iştirakçileri qayd ettiler ki, uquq qorçalayıcılar, vatandaş jurnalistleri ve “Qırım birdemligi” göñüllileriniñ çoqusı işğalli Rusiye akimiyeti tarafından taqip etilgen edi. Bazıları alâ daa qanunsız alda apishanelerde tutula.

Yañı repressiv sıñırlavlarnı köz ögüne alıp, areket şimdiki şeklinde faaliyetini toqtatmağa qarar aldı. Hususan, resmiy saytı ve içtimaiy ağlardaki saifeleriniñ işi toqtatılacaq. Aynı zamanda “Qırım birdemligi”niñ temsilcileri Rusiye akimiyetiniñ qararına bütün mevcut uquqiy vastalarnen şikâyet eteceklerini bildirdiler.

2016 senesi vaqtınca işğal etilgen Qırımda siyasiy mabüslerniñ ve Rusiye repressiyalarınıñ qurbanlarınıñ qorantalarına destek köstermek içün “Qırım birdemligi” cemaat teşebbüsi olaraq teşkil etildi. Faaliyeti devamında yarımadada insan aqlarınıñ bozuluvını qayd etüv ve Qırım siyasiy mabüsleri ve qorantalarına qol tutuvnıñ esas merkezlerinden biri oldı.

Qırımtatar Milliy Meclisi “Qırım birdemligi”niñ Qırımnıñ Rusiye işğali şaraitinde insan aqlarını qorçalavğa qoşqan issesini yüksek qıymet kese ve öz serbestligini telükege oğratıp, yıllar devamında siyasiy taqipler qurbanlarına yardım etken ve vaqtınca işğal etilgen yarımadada vaziyet aqqında kerçekni Ukrayina ve dünyağa bildirgen uquq qorçalayıcılarğa, vatandaş jurnalistlerine, advokatlarğa, göñüllilerge ve faalcilerge minnetdarlığını bildire.

Menba: заява громадського руху «Кримська солідарність» / “Qırım birdemligi” cemaat areketiniñ arizası.