Qırımtatar Milliy Meclisiniñ Reisi Türkiyede buluna

14.04.2026

Qırımtatar Milliy Meclisiniñ Reisi Refat Çubarov Türkiyede buluna ve qırımtatar diasporasınıñ cemiyetlerini ziyaret ete. Ziyarette Qırımtatar Milliy Meclisiniñ Reisi ile beraber Meclis azaları Abmecit Süleymanov ve Gayana Yüksel iştirak eteler. Körüşüvler devamında delegatsiyanı Ankaradaki Ukrayina Elçihanesiniñ medeniyet meseleleri vekili Anife Kurtseitova ozğara.

Ziyaret, Türkiyede qırımtatarlarnıñ toplu yaşağan yerlerinden biri olğan İstanbul vilâyetiniñ Çatalca rayonından başlandı. Çatalcanıñ yerli akimiyet organlarınıñ yolbaşçıları – şeer yolbaşçısı ve devlet memuriyetiniñ yolbaşçısı –, diaspora temsilcileri ile körüşüvde iştirak ettiler. Cemaat ile körüşüvden soñ delegatsiya Qırım hanlığınıñ tarihı ve Qaplan Geray, Selim Geray ve Halim Geray hanlarnıñ ayatınen bağlı yerlerni ziyaret etti, hususan Qırım hanlığı zamanında qurulğan qadimiy camini, hanlar ve olarnıñ aile azalarınıñ defin etilgen yerlerini ziyaret etti.

Nevbetteki noqta – Tekirdağ şeerindeki qırımtatar diasporasınıñ yerli cemiyetinen sıcaq ve faydalı körüşüv oldı. Hususan, Emir Yaqub (Emiryakup) köyü ayrıca ayrette qaldırdı, anda alâ daa esasen qırımtatarlar yaşaylar, tili, ananeleri ve medeniy mirasını saqlaylar, köyniñ soqaqları ise Qırım toponimleriniñ adlarını taşıy.

Delegatsiya Türkiyeniñ sanayı merkezlerinden biri olğan ve qırımtatar diasporasınıñ vekilleri yaşağan Gebze şeerini de ziyaret etti. Qırımtatar Milliy Meclisiniñ Reisi Refat Çubarov ve Meclis azası Abmedcit Süleymanov keçirgen körüşüvde İstanbulda Ukrayina Baş konsulı Roman Nedilskıy, milliy areket veteranı ve qırımtatar halqınıñ lideri Mustafa Cemilevniñ apayı Safinar Cemileva, Gebze belediyesiniñ reberligi – şeer başı ve devlet memuriyetiniñ yolbaşçısı – iştirak ettiler.

Türkiyege ziyaretiniñ birinci künü keçirilgen bütün körüşüvlerde vaqtınca işğal etilgen Qırımdaki vaziyet ve yarımadada rusiye akimiyetiniñ basqısı altında yaşağan qırımtatarlar, Ukrayinağa ve qırımtatarlarğa vatanında qoltutmaq içün diaspora ğayretleriniñ birleştirilmesi, Qırımtatar Milliy Meclisiniñ faaliyeti, em de Ukrayina içki inkişafı meseleleri, şu cümleden Ukrayina ükümetiniñ Qırımtatar Milliy Meclisine temsil organınıñ uquqiy statusını berüv qararını muzakere ettiler.

Bundan soñ delegatsiya yerli qırımtatar cemiyetinen körüşmek içün Yalova, Bursa ve Eskişehir şeerlerine yol aldı.