Menu 
Çiftlikköyde (Yalova) Mustafa Cemilevniñ adı parkqa berildi ve eykel qoyuldı
03 Iyün 2013
Yalova şeeriniñ Çiftlikköy qasabasında bir qaç yıl evelsi qurulğan şeer parkına Çiftlikköy Belediyesiniñ qararı ile qırımtatarlarnıñ milliy lideri Mustafa Cemilevniñ adı berildi. Bunıñ kibi de parkta Mustafa Cemilevniñ şerefine eykel qoyulıp, iyün 2 künü onıñ tantanalı açılışı oldı.
Yalova-Çiftlikköy yerli şurası tarafından alınğan mezkür qararnıñ maqsadı Qırım ve Türkiye arasındaki bağlarnıñ pekitilmesidir. Mustafa Cemilevniñ kendisi açılış toreninde iştirak etip olamadı.
“Pek büyük istegim olğanına rağmen maña bağlı olmağan sebeplerden dolayı açılış merasimine qatılıp olamayım”, denile Cemilevniñ teşkilâtçılarğa yolladığı haberde.
Açılış merasiminde Yalova rayon devlet memuriyeti reisiniñ yardımcısı Haldun Aksamlar, şeer belediyesiniñ başı Metin Dağ, Suvbaşı rayon memuriyetiniñ başı Mussa Quş, İzmir, Qocaeli, Gebze, İstanbul, Bursa, Balıkesir şeerlerindeki qırımtatar dernekleriniñ vekilleri ve Yalova civarında yaşağan qırımtatarlar iştirak ettiler. Qırımnı merasimde Milliy Meclis reisiniñ birinci muavini Refat Çubarov temsil etti.
Yalova qırımtatar derneginiñ başı Zeki Öztürk şeer belediye başqanı Metin Dağğa parkqa Mustafa Cemilevniñ adını bermek ve eykelini qoymaq imkânı içün teşekkür bildirdi.
Şeer belediye başqanı Metin Dağ öz çıqışında Yalova-Çiftlikköy ve Qırım arasında şübesiz tarihiy bağlar mevcut, çünki 8-10 evden başlağan Çiftlikköyde bugün 30 biñden ziyade aile yaşamaqta. Onıñ inkişaf etmesinde qırımtatarlarnıñ da büyük hızmeti bar, dedi. “Bugün bu parkqa Mustafa Cemilevniñ adı berildi. İnsan aqları ve demokratiya yeñişi içün küreş alıp barğan meşur insannıñ adınen parkımıznı adlandırmaq bizim içün büyük şereftir.
Bu qararnı biz belediye toplaşuvında 2012 senesi aralıq 3-te (157 raqamlı qarar) alğan edik. Qararnıñ qabul etilmesine qoltutqan bütün arqadaşlarğa teşekkür bildirmek isteyim”, dedi Metin Dağ.
