BMTnıñ Baş assambleyasınıñ eyyeti işğal etilgen Qırımda insan aqları qararınıñ leyhasını tasdıqladı

17 Noyabr 2022

BMTnıñ Baş Assambleyasınıñ üçünci uquq qorçalayıcı eyyeti, vaqtınca işğal etilgen Qırım Muhtar Cumhuriyeti ve Aqyar şeerinde insan aqları qararınıñ leyhasını tasdıqladı. 

Ukraina Prezidentiniñ Qırım MCdeki Vekilliginiñ matbuat merkezi bu aqqında haber berdi. O, işğal etilgen Qırımğa dair bu yañartılğan qararnıñ azırlıqlarına qatıldı.

– Qayd etmek lâzım ki, muvafaqiyetnen keçirilgen Qırım platformasınıñ İlk parlament sammiti ve Qırım platformasınıñ Ekinci sammiti yardımınen bizim BMTnıñ BAnda ciddiy destegimiz bar. BMTnıñ Üçünci eyyeti – yañartılğan qararnıñ tasdıqlanmasına ilk adım, soñ ise tamam Baş Assambleyada tasdıqlanmasıdır, – dep beyanatta yazıldı.

Prezidentniñ Qırım MCdeki daimiy vekili Tamila Taşeva, qararnıñ tasdıqlanmasını tefsir etti.

– Anda yañı çoq şey bar, tolu miqyaslı cenk kontekstinde devletimizniñ cenübine ücüm ve kelgen işğal, yañı takipler dalğası, siyasiy mabüslerniñ davaları, qanunsız mobilizatsiya platsdarmı olaraq Qırım aqqında añmaq bizim içün müim edi, – dep Taşeva qayd etti.

BU sene de BMTnıñ Baş Assambleyası, rusiyeniñ QMCni Ukrainağa qarşı tolu miqyaslı cenk içün platsdarm olaraq qullanmasını takbih etti. Em de Herson ve Zaporijjâ vilâyetlerini qanunsız işğal etmege ıntıluvı içün.

78 ülke mezkür qararnıñ leyhasını destek etti, 14 qarşılıq kösterdi ve 79 ise bitaraf oldı.