Bizim baş maqsadımız Qırımtatar halqı Meclisinen işbirlik qurmaq ve milliy aqlarnı qorçalav saasında onıñ tecribesini ögrenmektir

15 Oktâbr 2012

Oktâbr 15 künü Qırımtatar halqı Meclisiniñ ofisinde  Meclis reisi Mustafa Cemilev ahisqa türkler delegatsiyasınen körüşti. Ahisqa türklerniñ “Vatan” halqara cemiyetiniñ reisi Cavit Aliyev ve Amerikadaki Ahisqa türkleri cemaat merkeziniñ prezidenti İslam Şakhbandarov yolbaşçılıq yapqan  delegatsiyanıñ erkânına Kentukki ştatındaki ahisqalı türkler birleşmesiniñ başı Aydın Mamedov, bunıñ kibi de Amerikadaki Ahisqa türkleri cemaat merkezi prezidentiniñ yardımcıları Sarvar İsmailov ve  Halit Muradov kirdiler.

Meclisni körüşüvde  qırımtatar halqı meclisi reisiniñ birinci muavini  Refat Çubarov ve meclis tışqı alâqalar bölüginiñ başı  Ali Hamzin temsil ettiler.

“Biz qırımtatar halqı ve ahisqalı türkler milliy areketleriniñ arasında soñki on beş yıl içinde üzülgen bağlarnı ğayrıdan qurmaq içün keldik . 90-ncı yıllarnıñ başında  Moskvada bizler ellerimizni tutuşıp beraber turğan edik, – dedi Cavid Aliyev. – Tarihiy Vatanlarımızğa qaytarmalarını beraber talap etik, nazirlik ve idarelerge birlikte qatnadıq. Qırımtatarlarnıñ milliy areketi eñ müim strategik meselelerden birini çezip oldı ve halqını Vatanğa qaytardı. Teessüf ki, biz bu vazifeni eda etip olamadıq ve aqibette bugün bütün dünya boylap tarqaldıq. Lâkin buña baqamadan halqımız kün kelip, Gürcistanğa qaytacağımızğa inana”.

Amerikadaki Ahisqa türkleri cemaat merkezi delegatsiyasınıñ  Qırımğa kelmeleriniñ esas maqsadlarından biri  Milliy Meclis ve “Rusiye sürgün etilgen halqlar birligi” arasında imzalanğan memorandum boyunca 2013 senesi Qırımda keçirilmesi planlaştırılğan  SSSR sürgün etilgen halqları vekilleriniñ qurultayında iştirak etmek istegidir. 

Amerikadan kelgen musafirler  şunı qayd ettiler ki, bu qurultay bazasında sürgün etilgen halqlarnıñ aqlarını qorçalav ve ğayrıdan tiklev boyunca halqara teşkilâtnı meydanğa ketirip, onıñ erkânına  qırımtatarlapr, ahisqalı türkler, qaraçaylar, balqarlar, çeçenler, qalmıqlar ve diger halqlar vekillerini kirsetmek teklifinen çıqacaqlar. “Bizim baş maqsadımız Qırımtatar halqı Meclisinen işbirlik qurmaq ve milliy aqlarnı qorçalav saasında  onıñ tecribesini ögrenmektir”, – dediler delegatsiya azaları.

Mustafa Cemilev  körüşüv devamında  Amerikda yaşağan ahisqalı türklerniñ sayısınen meraqlandı. İslam Şakhbandarovnıñ bergen malümatına köre  Amerika vatandaşlığını endi  17 000 ahisqalı türk alıp, olar esasen Ögayo, Kentukki ve Missuri ştatlarında yaşamaqtalar. Onıñ aytqanına köre  tez arada  amelge keçirilecek programmalar boyunca  türkler sayısınıñ artması  6-7 biñ insannı teşkil etecek.

İslam Şakhbandanov  Amerikada ahisqalı türklerge munasebet pek yahşı olğanını ve ükümet olarnıñ inkişaf etmesi içün bütün şaraitlerni yaratqanını ayttı.  Bunıñ kibi de o, Türkiye ve ahisqalı türklerge qoltutqan siyasetçi ve kongress azalarınen özara işanç munasebetleri şekillengenini  qayd etti. İslam Şakhbandanov soñki vaqıtta Amerikada musulman mezarlığı açılğanı ve oña   Ahisqalı türkler cemiyeti baqqanı, milliy tasil meseleleri çezilgeni yani mektep ve mektepkece oquv müessiseleri qurulğanını bildirdi. 

Körüşüv devamında İslom bey  Qırımtatar halqı Meclisiniñ yolbaşçılarını  Amerikada oktâbr 30-da olacaq tedbirge davet etti. Oña  Amerikada yaşağan türkiy halqlarnıñ vekilleri ve yurt tışından musafirler kelmesi beklenile.

Öz nevbetinde Refat Çubarov  Meclis adından musafirlerni  Qırımtatar halqı Meclisiniñ reisi Mustafa Cemilev ve qırımtatar halqınıñ vatanğa qaytuv küreşi aqqında türkiyeli rejissörlar çıqarğan “Qırımoğlu. Bir halqnıñ milliy küreşi” adlı vesiqalı filmniñ taqdimine davet etti.