Başqanıñ toprağına ya da mülkine kirgen er kes o yerden çıqarılacaq – Çubarov
![Başqanıñ toprağına ya da mülkine kirgen er kes o yerden çıqarılacaq – Çubarov](https://qtmm.org/wp-content/uploads/2023/02/01000000-0aff-0242-1070-08db159eff2d_cx0_cy6_cw0_w1023_r1_s.png)
Qırımtatar Milliy Meclisiniñ başı Refat Çubarov, Aqmescit işğal akimiyetiniñ Meclisiniñ “milletleştirilgen” binasını muzika mektebine berme qararına qarşılıq kösterdi.
Suspilne Qırımğa tefsir etkende o qayd etti ki, Qırım qaytarılacaq soñ başqalarnıñ mülkini qanunsız olaraq zapt etken er kes, o yerden çıqarılacaqtır.
“Şimdi olar, bu binanen ne yapacaqlarını bilmezler ve bilgenime köre, Aqmescitteki 2. muzika mektebine vaqtınca berildi. Bundan tahminen yarım sene evel yerli propaganda telekanallarında anda (binalarda – muar.) evsiz insanlarnıñ yaşağanları aqqında süjetler seyir ettim. Qaytacağımız vaqıt başqanıñ toprağına ya mülkine, ya da evine kirgen er kes, o yerden çıqarılacaqtır”, – dep Refat Çubarov ayttı.
Hatırlatamız ki, quralaynıñ 24-ünde Qırım işğal parlamentiniñ mebusları, Ukraina prezidentiniñ apayı Olena Zelenskanıñ Yaltadaki dairesi ve Meclis binasını “milletleştirme” qararı berdiler.