«Bizim baş vazifemiz olacaq Halqara forum iştirakçileri içün tevsiyeler azırlamaqtır», – dedi Endrü Vilson

19 Sentâbr 2012

Sentâbr 18 künü Kiyevde Meclis yolbaşçılaorını Ukrainadaki elçilikler ve halqara teşkilât reberlerinen er yıllıq 2-nci körüşüvi olıp keçti

Körüşüvde çıqışta bulunğan Halqara forumğa azırlıq çerçisevinde Qırımdaki vaziyet boyunca mustaqil esabat azırlağan ekspertler gruppasınıñ halqara koordinatorı Endrü Vilson şunı qayd etti ki, soñki 20 yıl içinde Ukraina qırımtatar halqına yardım etmek içün elinden kelgeni qadar tırıştı.

“OSCE Aliy komissarı ofisiniñ teşebbüsi boyunca 7 mustaqil ekspertten ibaret gruppa yapılğan işlerge qıymet keserek, Ukrainada halqara yardımnı arttırmaq ve Vatanına qaytayatqan qırımtatar halqınıñ yerleşmesine qoltutuv meselelerini çezmekniñ usullarını araştıruvda tevsiyeler bermek maqsadındadır”, – dedi Endrü Vilson.

Endrü Vilsonnıñ sözlerine köre, sentâbr ayınıñ başında Gaagada ekpertlerniñ birinci teesis körüşüvi keçirilip, onda yapılatqan tedqiqatlarnıñ esas printsipleri, maqsad ve vazifeleri işlendi.

“Esabatnıñ inglizce versiyası şu seneniñ dekabrine qadar azır olacaq, – dep qoştı Endrü Vilson. – Biz ümüt etemiz ki, bu esabat halqara cemaatçılıq vekillerinden ibaret köntseptual gruppanıñ tizilmesine esas olur”.