“Aluşta” musulman cemiyeti islâm din erbaplarınıñ kitaplarını saqlağanları içün oña para cezasını berdiler

21 Dekabr 2023

Rusiye Federatsiyasınıñ nezareti astındaki Aluşta şeer makemesi, ”Aluşta” musulman diniy cemiyetine camide islâm din erbaplarınıñ kitaplarını saqlağanları içün 100 biñ ruble para cezasını berdi. Uquqçı Rustem Kâmilevge atıf eterek, ”Qırım birdemligi’‘ içtimaiy birleşmesi bu aqqında haber berdi.

Onıñ sözlerine köre, rusiye makemesi “aşırıcılıq malümatını tarqatuv” maddesine mücibi qarar berdi (RF MCQniñ 20.29. maddesi). Boş aynıñ 30-ında, yani camini tintken bir afta soñ rus quvetçileri tarafından muayyen protokol tizildi. O tintüv vaqtında camiden kitaplar çıqarıldı. Boş aynıñ 30-ında “Aluşta” cemiyetiniñ başı Abdul Ğafarovdan alınğan neşirler de aynı protokolğa kirsetildi. O bildirdi ki, kitaplaranıñ qısmı camide yoq edi, bir aftadan soñ evini tintkende olarnı alıp çıqadılar.

Beş neşir aqqında laf etemiz: ”İslâm, İman, İbadet” Osman Nuri Topbaş, ”Zikirniñ qıymeti”, ”Muhammed Peyğamber-2”, ”Halifelik tarihı” Abu Bakr as-Sıddik, ”Halifelik tarihı” Ali ibn Abu Talib kitapları, dep Qırım.Aqiqat bildirdi.

“Bu para cezasını din cemiyetimizge tesir olaraq tanıyım”, – dep cemiyetniñ başı Abdul Ğafarov, rusiye makemesiniñ qararını tefsir etti.