Alma Tarhan köy mektebine Şamil Alâdinniñ adına berilecek

12 Oktâbr 2012

12 oktâbr künü Qırımtatar akademik muzıkalı drama teatrinde belli qırımtatar yazıcısı ve cemaat erbabı Şamil Alâdinniñ 100 yıllıq yubileyine bağışlanğan aqşam ötkerildi.

Şamil Alâdin aqqında samimiy sözlernen Bağçasaray rayon devlet memuriyetiniñ başı, Meclis azası İlmiy Ümerov, Qırım Yuqarı Şurası medeniyet boyunca daimiy komissiyanıñ başı Sergey Tsekov, Qırım müendislik-pedagogika universitetiniñ rektorı Fevzi Yaqubov, Qırım Nazirler Şurası reisiniñ muavini Aziz Abdullayev, Ukraina Prezidentiniñ Qırımdaki daimiy temsilcisiniñ muavini İbraim Mamutov, Tavriya milliy universitetiniñ professorı Ayder Memetov, bunıñ kibi de Qırımtatar yazıcılar birliginiñ reisi Riza Fazıl çıqışta bulundılar.

İlmiy Ümerov öz çıqışında Bağçasarayda qırımtatar tilinde tasil berilgen üç mektep olğanını aytıp, “Olardan birisi Alma Tarhan köyünde ve şu mektepke Şamil Alâdinniñ adı berilecek. Yaqın arada bu mesele baqılacaq”, dedi.

Şunı hatırlatamız ki, 2012 senesi iyül 12-de Aqmescitte belli qırımtatar yazıcısı ve cemaat erbabı Şamil Alâdin yaşağan Jukovskiy adına soqaqtaki 20-nci evde hatıra tahtası qoyuldı.