Ukrayina Silâlı Quvetleri künü hayırlı olsun!

06.12.2025

Qırımtatar Milliy Meclisi bütün arbiy hızmetçilerni ve ukrayin cemiyetini Ukrayina Silâlı Quvetleri Kününen samimiy hayırlay!

Devletimiz içün eñ ağır çağıruvlar vaqtında Ukrayina Silâlı Quvetleri er bir evni, er bir qorantanı, Ukrayina toprağınıñ er bir parçasını rus barbarlarından qorçalap, serbestlik, namus ve qaviylik qalqanı oldı.

Ukrayinanıñ bütün vatandaşlarınen beraber orduda qırımtatarlar da hızmet ete, Rusiye istilâcısına cesürlik köstere. Ukrayina qorçalayıcısınıñ fedakârlığı, ukrayin cemiyetiniñ birleşmesi ve Ukrayina Silâlı Quvetlerinen birlik sayesinde Qırım ve devletimizniñ diger işğal etilgen topraqları azat etilecek.

Arbiy hızmetçilerge, er keske, ög cebede ve diger yönelişlerde bulunıp, Ukrayina devletini qorçalağan er keske teşekkürler bildiremiz.

Arbiy hızmetçilerniñ qorantaları, tuvğanları ve yaqınlarına – olarnıñ sevgisi, destegi ve sabırları içün teşekkürler bildiremiz, olar arbiy hızmetçilerge küç bere ve ilhâmlandıra.

Ukrayina içün canını feda etken er kesniñ hatırasını ürmet etip, başımıznı egemiz!

Bütün ukrayin arbiy hızmetçilerine qaviylik, cesaret ve Yüce Allahnıñ qoruvını tileymiz!

Ukrayinağa şan-şerefler!

Qaramanlarğa şan-şerefler!

Refat Çubarov,

Qırımtatar Milliy Meclisiniñ Reisi

Kıyiv ş.

2025 senesi ilk qış ayınıñ 06-sı