Saban ayınıñ 8-9 künleri – Balkar halqınıñ sürgünliginiñ yıllığı

08 March 2025

1944 senesi saban ayınıñ 8-9 künleri Stalin rejimi bütün halqlarğa qarşı daa bir cinayet işledi – balkar halqını Kabardino-Balkar MŞSC toprağından mecburiy sürgün etti. Lavrentiy Beriyanıñ emrinen, sahte kollaboratsionizmde qabaatlanıp, 37 biñden çoq balkar Qazahistan ve Qırğızistannıñ uzaq rayonlarına sürgün etildi.

Bu cinayet, qırımtatar halqınıñ sürgünligi kibi, Stalin rejiminiñ fizikiy yoq etüv, nesillerni parçalav ve bütün etnik gruppalarnıñ devletçiligini yoq etüv genotsid siyasetiniñ bir qısmı edi. Balkarlarnıñ sürgünligi kütleviy ölümler, içtimaiy, medeniy ve iqtisadiy qurulışınıñ yoq etilmesine ve alâ daa duyulğan teren yaralarğa yol berdi.

Böyle bir cinayetniñ fedası olğan qırımtatar halqı balkarlarnıñ acısını paylaşa ve tuvğanlarını coyğan ve sürgünlik sınavından keçmege mecbur olğanlarğa samimiy taziyelerini bildire. Tarihiy aqiqat, adalet ve er bir halqnıñ öz toprağında yaşamaq aqqı oğrunda küreşte biz de sizlernen berabermiz.

Sürgünlik fedalarınıñ hatırası, bu kibi cinayetler bir daa tekrarlanmamaq kerekligi aqqında epimiz içün bir ibret olsun.

Balkar halqınıñ sürgünliginiñ fedaları nur içinde yatsınlar!

Qırımtatar Milliy Meclisiniñ Reisi ​​​​

Refat Çubarov

2025 senesi saban ayınıñ 8-i

Kıyiv ş.