Qırımda qırımtatarlarnıñ evlerini tinteler

06 February 2025

Endi eki sabadır Qırımda qırımtatarlarnıñ evleri tintile.

Kiçik aynıñ 6-nda saba quvetçiler, sabıq siyasiy mabüs İsmail Ramazanovnıñ babası qırımtatar faalcisi Seytnebi Ramazanovnıñ evini tinttiler.

Şimdilik tintüv yekünlendi, quvetçiler telefonını ve bazı vesiqalarnı tutıp aldılar, faalci ise  evde buluna ve tutulmadı.

“Birinci malümatlarğa köre, onıñ oğlu – sabıq siyasiy mabüs İsmail Ramazanov Qırım tışında buluna, taqiqat tedbirleri keçirile. Bu sebepten babasınıñ evi tintildi. Seytnebi Ramazanovnıñ aytqanına köre, İsmailniñ vesiqaları, fotoresimleri, telefonı alındı”, – dep “Qırım birdemligi” birleşmesiniñ mühbiri bildirdi.

Kiçik aynıñ 5-nde ise Canköy ve İslâm-Terek (Kirov) rayonlarında qırımtatarlarnıñ evleri kütleviy şekilde tintildi. Beş tintüv aqqında haber etildi – Emir Kurtnezirov, Abibulla Smedlâyev, Rustem Mustafayev, Bahtiyar Ablayev ve Mirzali Tacıbayev.

Daa soñra qapalı makeme oturışları keçirildi, anda Emir Kürtnezirov (siyasiy mabüs Remzi Kürtnezirovnıñ oğlu), Abibulla Smedlâyev (dört çağına yetmegen balanıñ babası) ve Rustem Mustafayev (üç çağına yetmegen balanıñ babası) 2025 senesi çiçek ayınıñ 4-ne qadar apiske alındı.