Ceppar yañı vazifege tayinlendi

23 Fevral 2024

Ukraina prezidenti Volodımır Zelenskıy, Emine Cepparnı Viyanadaki halqara teşkilâtlarnıñ uzurında Ukrainanıñ daimiy temsilcisi vazifesine tayinledi.

”Caparova Emine Ayarovnanı Viyanadaki halqara teşkilâtlarnıñ uzurında Ukrainanıñ daimiy temsilcisi vazifesine tayin etmek”, – Ukraina Prezidentiniñ maqbul emrinde bildirildi.

Öz Facebook saifesinde Ceppar ukrain lideri ve tış işleri naziri Dmıtro Kulebağa teşekkür bildirdi.

”Yañı ufuqlar, yañı vazifeler, devletimizniñ yekâne ve esas Ğalebe Yolunda! Nazir Dmıtro Kuleba ve Ukraina Prezidenti Volodımır Zelenskıyğa işanç köstergenleri içün minnetdarlıq bildirem!” – dep Ceppar öz tayinlenüvini tefsir etti.

2020 senesi bozarğan aynıñ 10-unda Emine Ceppar, Ukraina tış işleri naziri Dmıtro Kulebanıñ birinci muavini vazifesine tayinlendi. 2020 senesi bozarğan aynıñ 14-ünde Ukraina prezidentiniñ emrinen o, UNESCO işleri boyunca Ukraina Milliy eyyetiniñ yolbaşçısı vazifesine tayinlendi, dep Qırım.Aqiqat bildirdi.

Ceppar, diplomatiyanıñ siyasiy ve halq ögündeki meselelerni idare ete, AB ve NATO kibi halqara teşkilâtlarnen işdeşlik yapa, Ukrainanıñ halqara añlaşmalarını yerine ketirmege ve riayet etmege, “Ukrain institutı” DUnıñ faaliyetini idare ete. Ceppar, “Qırım platforması”nıñ maqsatları ve vazifeleriniñ yerine ketirilmesini, inkişaf strategiyasınıñ şekillenmesi ve yerine ketirilmesini idare ete.