İçtimaiy ağlarda rusiye tenqit etken Qırım sakinini tevqif ettiler

26 Yanvar 2024

İşğalciler, içtimaiy ağlarda Rusiye tenqit etken Yalta sakini Oleksandr Savıtskıynı 10 künge tevqif ettiler. Uquq qorçalayıcılarnıñ sözlerine köre, siyasiy sebeplerden onı taqip ettiler.

Rus taraflı bloger Oleksandr Talipovnıñ sözlerine atıf eterek Qırım uquq qorçalayıcı gruppası (QUQG) bu aqqında haber berdi.

Bildirildi ki, qara qış ayınıñ 24-ünde onıñ kanalında Yalta sakini Oleksandr Savıtskıynıñ tutulmasının bir video yayınlandı.

“Yaltada tutulğan ve içtimaiy ağlarda Rusiye ordusını faalca tenqit etken, prezidentini söggen, ülkeniñ topraq bütünligini red etken ve USQni beklegen Oleksandr Savıtskıy, natsizm ifadelerini yayınladı”, — dep Talipov yazdı.

Onıñ sözlerine köre, işğal makemesiniñ qararınen adam 10 künge tevqif etildi, 20.3.3. (“ordu itibardan tüşürüv”) maddege köre ona qarşı protokol tizildi, dep Suspilne Qırım bildirdi.

QUQGnıñ idaresiniñ başı Olha Skrıpnıknıñ sözlerine köre Oleksandr Savıtskıy, qart anasına baqmaq içün şeerde qaldı.

“O, içtimaiy ağlarda öz tenqit postlarınen bellidir. O, işğal akimiyeti aqqında sarkazm metinlerini yazdı, onı tenqit etti ve onı küldi. Cineytlerini de qayd etti. O, böyle degen “referendumlar” aqqında metinlerni de yazdı. Tamam bu – onıñ halq ögündeki bildirmeleri – taqip sebebi oldı”, – dep uquq qorçalayıcı añlattı.

Bundan ğayrı, o qayd etti ki, taqiplerniñ siyasiy sebepleriniñ delillerinden biri, Savıtskıynıñ tutulması şeklidir.

“Oña qarşı memuriy dava açılğanına baqmadan işğal akimiyeti OMON, cinayetçi kibi onı tutqan büyük quvetçiler gruppasını qullandı. Böylece, tüşünmek mümkün ki, işğal akimiyetiniñ kelecek adımı, cinaiy taqip olur. Buña köre biz tüşünemiz ki, öz fikirlerini bildirgen Oleksandr Savıtskıynıñ taqibi tamam siyasiy sebeplidir”, – dep Olha Skrıpnık qayd etti.