Qırımda işğalciler Herson vilâyetine kiriş sıñırlamaları ilân ettiler

25 Yanvar 2024

Qırımnıñ Rusiye akimiyeti Herson vilâyetiniñ memuriy sıñırındaki kiriş ve çıqışta «hususiy rejim» ilân etti.

Rusiye tarafından kontrol etilgen Qırımnıñ başı Sergey Aksönovnıñ bergeni emirge köre, Qırım ve Herson vilâyetiniñ işğal etilgen toprağı arasında kiriş ve çıqışta «hususiy rejim» kirsetile. Qırım.Aqiqat bu aqqında haber berdi.

Bu emirge köre, Qırımnıñ şimalinde keçit rejimi «Rusiye Federatsiyasınıñ devlet sıñırından keçit rejiminen aynı» ola. Qırım ve Herson vilâyeti arasında memuriy sıñırından maşna keçit noqtaları «Armânsk», «Perekop», «Canköy» ve demiryol keçit noqtaları «Armânsk» ve «Canköy» belgilendi.

«Qırım Cumhuriyet ve Herson vilâyeti arasında memuriy sıñırnı keçüv bu alda kerçekleştirilecek: ecneviy vatandaşlarnıñ ya da vatandaş olmağan şahıslarnıñ şahsiyetini köstergen ve halqara añlaşmalarğa köre Rusiye Federatsiyası tarafından tanınğan vesiqası olacaq», – dep vesiqada qayd etildi.

Bundan ğayrı, vesiqağa köre, Rusiye arbiy kolonnaları Rusiye FSBniñ sıñır idaresinden tasdıq alıp, ayrı yollardan areket etecek.