Bu sene eñ az 25 qırımtatar siyasiy mabüsi rusiyege etap etildi

15 Sentâbr 2023

2023 senesi devamında Qırımda siyasiy sebepli taqiplerniñ eñ az 25 qurbanı rusiyedeki apishanelerge etap etildi. Bu da cenk cinayetidir. QırımSOS analitikacısı Yevheniy Yaroşenko bunı añlattı.

Keçenlerde QırımSOS, 2023 senesi rus apishanelerine etap etilgen 14 insandan ibaret etken cedvelni yayınladı. Berim ayınıñ 13-ünde ise cedvelge daa 11 insan kirsetildi.

Bundan evel belgilengen qırım siyasiy mabüslerinden ğayrı 2023 senesi oraq ayında “Hizb ut-Tahrir davası”nıñ ekinci Aqmescit gruppasınıñ dört iştirakçisi de rusiyedeki apishanelerge qanunsız olaraq etap etildi. Vladlen Abdulkadırov Lıpetsk vilâyetindeki apishanege, Tofik Abdulgaziyev Çelâbinsk vilâyetindeki apishanege, İzzet Abdullayev ve Rayim Ayvazov Ulyanovsk vilâyetindeki apishanege etap etildi.

2023 senesi arman ayında daa üç qırım siyasiy mabüsi rus apishanelerine qanunsız olaraq etap etildi. “Hizb ut-Tahrir davası”nıñ ekinci Aqmescit gruppasınıñ daa bir iştirakçisi Bilâl Adilov Novoçerkasktaki SİZOdan Krasnoyarskiy kraydaki aspihanege etap etildi. “Hizb ut-Tahrir davası”nıñ üçüni Bağçasaray gruppasınıñ iştirakçisi olğan Amet Süleymanov Aqmescitteki SİZOdan Vladımırdaki apishanege etap etildi.

İçtimaiy jurnalist İrına Danılovıç Aqmescitteki SİZOdan Stavropolskıy kraydaki tüzetici müstemlekege etap etildi.

2023 senesi berim ayında endi dört qırım siyasiy mabüsi, rus apishanelerine qanunsız olaraq etap etildi. Olardan üçü – Novoçerkasktaki SİZOda tutulğan “Hizb ut-Tahrir davası”nıñ ekinci Aqmescit gruppasınıñ iştirakçileridir. Akim Bekirov Saratov vilâyetindeki apishanege, Rustem Seithalilov Ulyanovsk vilâyetindeki apishanege, Asan Yanikov Vladımır vilâyetindeki apishanege yollandı.

“Hizb ut-Tahrir davası”nıñ Qarasuvbazar gruppasınıñ iştirakçisi Azamt Eyüpov, Çelâbinsk vilâyetiniñ Verhnöuralsk şeerindeki apishanege etap etildi.

Qırım yarımadasından rusiye topraqlarına şu cümleden siyasiy mabüslerni, vatandaşlarnı etap etmek, cenk cinayetidir. İşğalciler böyle areketlerinen IV Jenevre şartnamesiniñ 29. ve 76. maddelerini bozalar. IV Jenevre şartnamesiniñ 76. maddesine mücibi “cinayet yapmaqta qabaatlanğanlar işğal etilgen ülkede bulunmalılar, maküm etilseler, anda da ceza müddetini keçirmeliler”.