Moskvanıñ makemesi Leniye Umerovanı casuslıqta qabaatlap tevqif etti

05 Mayıs 2023

Moskvanıñ Lefortov makemesi, qırımtatar Leniye Umerovanı devlet casuslığında qabaatlap tevqif etti. Qırım.Aqiqat bu aqqında haber berdi.

Râbtsev adlı makemeci resmiy ricanı qanaatlendirdi ve Umerovanı tevqif etti. Keçenlerde bildirildi ki, RF TFHniñ işçileri, qırımtatar Leniye Umerovanı Vladıkavkazdaki Rusiye UMVSnıñ vaqtınca tutuv izolâtorından belli olmağan yerge ketirdiler.

Mayıs ayınıñ 1-inde haber berildi ki, Şimaliy Osetiya-Alaniya Cumhuriyetiniñ TFH, tahminen yarım sene Rusiyede tutulğan 25 yaşındaki Qırımnıñ sakini Leniye Umerovanıñ vesiqalarını alıp çıqardı.

Keçken sene ilk qış ayında 25 yaşındaki Leniye Umerova Kıyivden Qırımğa ketmek kerek edi, çünki babası onkologiya hastalığını çeke. O, gürci-rus sıñırını keçken soñ onıñ rejim zonasınıñ qaidelerini bozğanı içün rus quvetçileri onı tuttılar.