Bir senedir Qırımda rusiye hırsızlanğan ispan göñüllisini tuta

25 Aprel 2023

Rus işğalcileri tanıdılar ki, Mario olaraq belli olğan ispan göñüllisi Maryano Harsia Kalatayudanı tutalar.

“QırımSOS” uquq qorçalayıcı teşkilâtı bu aqqında haber berdi.

– Rusiye Arbiy Prokurorlığı, RF TFHniñ ispan göñüllisi Marionı alıp ve Aqmescitteki SİZOda tutqanlarını tanıdı. Adamnı sanki “Rusiyeniñ telükesizligine zarar ketirici areketlerge ait olğanı” içün qabaatlanalar. “rf Qara deñiz flotunıñ arbiy prokurorlığı”nıñ mektüp-cevabından belli oldı, – dep teşkilâtnıñ idaresiniñ başı Oleksiy Tilnenko qayd etti.

Mektepte şu yazıldı:

– “Mahsus arbiy operatsiya” (rusiye böylece Ukrainağa qarşı cenkni adlandıra – müarrir) vaqtında RFnıñ telükesizligine zarar ketirici areketlerge ait olıp-olmağanını teşkemek maqsadınen Rusiye TFHniñ “Qırım Cumhuriyeti ve Aqyar şeerindeki” idaresiniñ memuriy şahısları tarafından tesbit etilgen yol-yoruqta İspaniya vatandaşı Harsiya Kalatayud Maryano cinaiy-icra sistemasınıñ müessisesine ketirildi ve bugünge qadar anda buluna, oña dair teşkerüv tedbirleri bitirildi.

Maryano Harsia Kalatayud – sekiz senedir Ukrainada yaşağan ve göñülli olaraq faaliyet yapqan İspaniya vatandaşıdır. Saban ayınıñ 19-ında işğal etilgen Herson şeerinde ukrain taraflı numayışqa ketken soñ adam ğayıp oldı. Bundan soñ yerli faalciler haber berdiler ki, Marionı Hersonda tuta ediler, amma soñunda azat etildi.  Göñüllinen bağ qurmaq mümkün olmadı ve onıñ taqdiri belli olmay.