Advokat, ağır hasta olğan siyasiy mabüs Amet Suleymanovnen körüşti

07 Aprel 2023

Advokat Emil Kurbedinov, keçenlerde Bağçasaray vaqtınca tutuv izolâtorına ketirilgen Amet Suleymanovnen körüşe bildi. Qorçalayıcınıñ sözlerine köre, jurnalistni normal şartlarda tutalar, faqat o muntazam baş ve qalp ağrısını çeke. Qırım.Aqiqqat bu aqqında haber berdi.

– Ruhiy alı yahşıdır – bunıñ daa bir sınav olğanını pek yahşı añlay. Bu ceetten Ametni bozamazlar. Sağlığı ise o qadar yahşı olmay, elbette. Suleymanov ayta ki, muntazam tarzda baş ağırısını çeke, qalbi onı raatsız ete. Kamerada öz başındadır. Ayta ki, şartlar nasıldır yahşı, avalandıruv sisteması bar, sigar tumanı yoq, – dep advokat añlattı.

Kurbedinov qoştı ki, belki yaqın kelecekte Suleymanovnı Aqmescitteki SİZOğa ketirirler ve bundan soñ rus apishanelerinden birine.

– Bu kerçekten de hırsızlav ve halqara uquqnı bozuvdır, – dep qayd etti.

Üç senedir Suleymanov, sağlıq alı sebebinden ev tevqifi astında edi. Adamnıñ qalbiniñ arteriya ve mitral kemligi bar ve qalp klapanını acelen deñiştirmek kerek.

Makeme ceryanı vaqtında qorçalayıcı taraf tasdıqlamağa tırışa edi ki, Suleymanovğa qarşı bu tür tedbir keçirmek olmaz.