Tutulğan faalci Serhiy Tsıpiha casuslıq içün qabaatlana – uquq qorçalayıcılar

03 Yanvar 2023

_{Foto: “Zmina” insan aqları merkezi}

Herson vilâyetiniñ Nova Kahovka meskün yerinden ve şu anda Aqmescitteki SİZOda tutulğan jurnalist, yazıcı ve faalci, “Kahovskıy platsdarm” İTniñ reberi Serhiy Tsıpiha casuslıq içün qabaatlana (RF CQniñ 276. maddesi, on – yigirmi senelik üküm). Qırım uquq qorçalayıcı gruppası bu aqqında haber berdi.

Belli olğanı kibi, Serhiy Tsıpiha – Herson vilâyetiniñ Nova Kahovka meskün yerinden kelgen, “Kahovskıy platsdarm” İTniñ reberi, içtimaiy jurnalisttir. Mart ayınıñ 12-sinde qaynanasına ilâç bermek içün Tavriskke ketkende ğayıp oldı.

Mart ayınıñ 13-ünde tutulğan juranlist Oleh Baturin azat etilgen soñ añlattı ki, Herson vilâyeti devlet memuriyetiniñ binasında bulunğanda sorğu odalarından birinden kelgen Serhiy Tsıpiha adını ve sesini eştti. “Zmina” insan aqları merkeziniñ bilgilerine köre, senâtbr ayında Serhiy Tsıpiha Qırımda tutula.

Tek oktâbr ayında belli oldı ki, Serhiy Tsıpiha Aqmescitteki 1. SİZOda tutula.

Dekabr ayınıñ başında ögrenildi ki, Herson vilâyetiniñ Nova Kahovka meskün yerinden kelgen jurnalist, yazıcı ve faalci, “Kahovskıy platsdarm” İTniñ reberi Serhiy Tsıpiha Aqmescitteki yañı SİZOğa ketirildi.

Aynı zamanda Serhiy Tsıpihanıñ advokatı malümat soratmasını yapıp, FSB cevap berdi ki, o “ayatına ve sağlığına telüke astına ketirmegen şartlarda bulunır”. Mektüpte yazıldı ki, FSB “SVO keçirgende RFnıñ telükesine zarar ketire bilgen areketler aqqında malümat teşkere”.