Tutulıp hırsızlanğan göñülli esirlikteki azaplarnı añlattı

03 Noyabr 2022

Qırım uquq qorçalayıcı gruppasınıñ saip olğanı arizanıñ metninde Yaroslav Juknıñ yazğanına köre, iyün ayınıñ 17-sinde Melitopol şeerindeki 50 rokiv Peremohı soqağınen ketken. “ATB” tükânı yanında onıñ yolunda BMW maşnası toqtağan. Ondan silânen bir adam çıqqan ve pıştav vastasınen qorqutaraq Juknı maşnasından çıqarğan, urmağa başlağan, buğavlarnı ve başına çuvalnı tikken.

– Bundan soñ o ve bir qaç tanımağan adam meni mağaz odasına ketirip, anda tahminen bir afta tuta ediler. Bütün bu vaqıt boyunca skotçnen pekitilgen başımda çuval edi. Tahminen er buçuq saat tanımağanım adamlar kelip, meni azaplay ediler: ayaqlarıma, ellerime, cınsiy organıma, quqalarımnıñ memelerine ve emçeklerime telni tayandıraraq aqımnen döge ediler. Bütün bedenimni toqal eşyalarnen ure ediler. Ayaqlarımnıñ tüplerini gaz çaqmaq vastasınen ateşke bere ve aynı zamanda ahlâqiy olaraq qılına ediler, – dep göñülli yazdı.

Azaplar vastasınen özü aqqında sahte bilgiler añlatmağa ve sahte davanı imzalamağa mecbur ettiler.

İyün ayınıñ 17-sinden avgust ayınıñ 8-sine qadar Yaroslav Juk mağazda tutula edi. Bundan soñ Qırımdaki Aqmescit Telükesizlik Federal hızmetiniñ İdaresine zornen ketirildi.

Göñülli, Rusiye Federatsiyasınıñ Cianiy Qanunnamesiniñ 361. maddesiniñ 1. qısmında (halqara terrorcılıq areketi) espqa alınğan cinayet içün qabaatlana. Maddeniñ sanktsiyası: ondan yigitmige qadar sene ya da ölümge qadar serbestten marum etmesi.