Meclisniñ başı, ukrain akimiyetini mobilizatsiya sebebinden çıqqan qırımlılarğa yardım etmege çağıra

05 Oktâbr 2022

Refat Çubarov ukrain akimiyetini mobilizatsiyadan qaçınmaları içün çıqqan qırımlılarğa yardım etmege çağırdı.

– Maqbul Ukraina icra akimiyet organları, mebusları da Ukraina devletiniñ olarğa bergeni biñlerce Ukrain vatandaşı-vaqtınca işğal etilgen Qırımnıñ sakininiñ ayat-memat meseleleri olğan vazifelerni yapmağa qaçınalar. Başqa bir çarem olmağanı içün tamam akimiyetke bu şekilde muracaat etmege mecburım, – Facebookta Çubarov yazdı.

Onıñ sözlerine köre, şimdi ukrain akimiyeti ve Qırımtatar Milliy Meclisiniñ mümkün olğan er bir şekilde rus ordusına mecburiy mobilizatiyadan qaçınmaq çağıruvını eşitken biñlerce Ukraina vatandaşı ğurbetlikte evsiz, issi urbasız ve parasız buluna.

– 10 kündir çeşitli akimiyet odaları, farqlı mebuslar yanına kelip muracaat etemiz, er kes accımıznı añlay, amma epsi bu, – dep Meclisniñ başı qoştı.

Çubarovnıñ fikrince, gumanitar felâketniñ hususiyetlerine sahip olğan soñ derecede tenqidiy vaziyet Eyyetler arası iş gruppasınıñ (Sağlıq nazirligi, Adliye nazirligi, Devlet bergi hızmeti, Devlet migratsiya hızmeti, İç işler nazirligi, Ukraina Prezidentiniñ Ofisi, Meclis v.b.) teşkil etilmesini talap ete. Aynı zamanda koordinatsiya meselelerini de icra akimiyetiniñ merkeziy organlarından biri al etmek kerek.

– Qırımdaki rus işğal akimiyetiniñ ceza organları ise mobilizatsiyadan sanki qaçınğan insanlarnıñ çaresiz keri qaytmalarını sabırsızlıqnen bekleyler… Ve o zaman cezacılar özlerini alacaqlar, – dep Çubarov qayd etti.