Qurultay Teftiş komisyonınıñ toplaşuvı olıp keçti

11 Yanvar 2015

2015 senesi, ocaq 11-de qırımtatar halqı VI Qurultay Teftiş komisyonınıñ nevbetteki toplaşuvı olıp keçti. Kün tertibinde beş mesele baqılıp çıqılğan edi.

İlk mesele olaraq “Fevqulâde vaziyet aqqında” nizamname leyhasını muzakere etip tasdıqlamaq ve Milliy Mecliske teklif etmek meselesi baqıldı. Muzakereden soñ, rey birliginen Milliy Mecliske metni qabul etilgen “Fevqulâde vaziyet aqqında” nizamname leyhasını teklif etmek qararı alındı.

Ekinci ve üçünci meseleler – Milliy Mecliske muracaat etip, Qurultaynıñ 3-ci oturımını teşkil etip toplamasını, onıñ keçirilecek kününi ve kün tertibini eñ yaqın zamanda ilân etmesini teklif etmek ile resmiy saytını derhal tiriltmesini, Milliy Meclisniñ ise, er ay, eñ olmağanda, bir toplaşuv keçirmesini teklif etmek meseleri oldı. Rey birliginen Milliy Mecliske muracaat etip, eñ yaqın zamanda Qurultaynıñ 3-ci oturımını teşkil etip toplamasını, onıñ keçirilecek kününi kesmek ve kün tertibini ilân etmesini teklif etmek ve resmiy saytını derhal tiriltmesini, Milliy Meclisniñ ise, er ay, eñ olmağanda, bir toplaşuv keçirmesini teklif etmek qararları alındı.

Dörtünci mesele olaraq Qırımnıñ işğali ve tintevlerniñ başlaması vaqtından itibaren, cöremeler dahil, semetdeşlerimizniñ aq-uquqı bozuluvı aqqında tolu malümatnıñ toplanması meselesi muzakere etildi. Neticede, regional meclisler reislerinden, işbu malümatnı Teftiş komisyonınıñ toplaması qararı qabul etildi.

Soñ olaraq, “Ukrainanıñ tamır halqı olaraq, qırımtatar halqınıñ statusı aqqında” qanun leyihasını azırlap çıqmaq içün qurulğan İş komisyonınıñ erkânına Teftiş komisyonınıñ vekilini yollamaq meselesi baqıldı, rey birliginen işbu İş komisyonınıñ erkânına Teftiş komisyonınıñ vekili olaraq reisi Ali Özenbaşnı yollamaq qararı alındı.

Kün tertibindeki meseleler ve alınğan qararlarnen daa etraflı olaraq Milliy Meclisniñ resmiy saytında yayınlanğan Teftiş komisyonı toplaşuvınıñ protokolından ögrenmek mümkün.