Bütünqırım mitinginiñ iştirakçileri Qırım Anayasasınıñ yañı şekilini azırlav ve qabul etüv boyunca mahsus komissiyasını acele sürette meydanğa ketirmekni talap ettiler

23 Fevral 2014

Ukraina Yuqarı Şurasına,

Ukraina halq deputatlarına

Qırım Halq cumhuritetiniñ reisi, Qırım, Poloniya, Litvaniya ve Beyaz Rusiye musulmanlarınıñ müftiyi, “Ant etkenmen” qırımtatar milliy gimniniñ müellifi Noman Çelebicihannıñ hatırasına bağışlanğan Bütünqırım mitingi iştirakçileriniñ muracaatı

Onlarnen tınç sakinlerniñ elâkına ketirgen siyasiy inqiraz ve Ukraina akimiyetiniñ öz vatandaşları üzerinden silâlı zorbalığı aqibetinde Ukrainanıñ territorial bütünligi ve mustaqilligine telüke Ukraina Yuqarı Şurası tarafından kelecekte Ukrain devleti ve vatandaşlarınıñ ömürine havfnıñ ögüni alacaq qanuniy aktlarnıñ qabul etilmesini talap ete.

Qırım Muhtar Cumhuriyetiniñ mevcut Anayasası çoqmilletli Qırım cemiyeti, şu cümleden qırımtatarlarnıñ da, menfaatlarına iç uymağanından ğayrı Qırımda vaziyetniñ kerginleşmesiniñ daimiy menbasıdır. Bundan da ğayrı, Qırımnıñ mevcut statusı Ukraina bütünligi ve mustaqilligine telükeniñ temeli oldı.

Biz, Bütünqırım mitinginiñ iştirakçileri, Ukraina Yuqarı Şurasından Qırımtatar halqı Meclisiniñ vekilleri de erkânına kirsetilgen Mahsus deputat komissiyasını meydanğa ketirmekni talap etemiz. Qırım Anayasasınıñ yañı şekilini azırlav ve qabul etüv boyunca mezkür komissiya qırımtatar halqınıñ mustaqil Ukraina terkibinde öz tarihiy toprağında öz aqlarını belgilev aqqınıñ esasında Qırım sakinleriniñ milleti ve dininden qatiy nazar aqları ve serbestliklerini temin etken yañı Anayasanı işleycek.

Qırım Halq cumhuritetiniñ reisi, Qırım, Poloniya, Litvaniya ve Beyaz Rusiye musulmanlarınıñ müftiyi, “Ant etkenmen” qırımtatar milliy gimniniñ müellifi Noman Çelebicihannıñ hatırasına bağışlanğan Bütünqırım mitingi iştirakçileri

2014 senesi fevral 23. Aqmescit ş.