Yalta regionınıñ yerli meclislerine saylavlar ve Aluşta regionındaki bazı maalliy meclislerge ğayrıdan saylavlarnı keçirüv müddeti tasdiqlandı

02 Mart 2012

Mart 1 künü Aqmescit şeerinde Yerli meclislerge saylavlarnı azırlav ve keçirüv boyunca komissiyanıñ toplaşuvı olıp keçti.

Qırımtatar halqı Meclisiniñ reisi Mustafa Cemilevniñ teşebbüsinen meydanğa ketirilgen Komissiyanıñ toplaşuvını onıñ reisi, Milliy Meclis reisiniñ birinci muavini Refat Çubarov alıp bardı.

Kün tertibine eki mesele qoyuldı: Aluşta regionınıñ yerli meclislerine saylav boyunca Küçük Üzen maalliy territorial saylav komissiyasınıñ erkânı aqqında ve cemaat teşkilâtlarınıñ teklifi boyunca Yalta regionındaki yerli territorial saylav komissiyalarınıñ erkânına qoşumcalar kirsetüv.

Rey berüv neticelerine köre birinci mesele boyunca Küçük Üzen maalliy territorial saylav komissiyasınıñ erkânını Aluşta regionı komissiyası azalarınen seminar keçirilgenge qadar deñiştirmeden qaldırmaq qararı alındı.

Ekinci mesele boyunca ise yerli territorial saylav komissiyalarınıñ azalığına cemaat teşkilâtları teklif etken namzetlerni kirsetmek qararlaştırıldı.

Malümat içün:

Aluşta şeeri, Aluşta regionınıñ Büyük Lambat, Küçük Üzen, Körbekül yerli meclislerine saylavlar 2012 senesi aprel 28-de keçirilecek.
Saylav işi 2012 senesi mart 14-ten başlana.

Yalta regionınıñ yerli meclislerine saylavlar 2012 senesi aprel 29-da ötkerilecek. .
Saylav ceryanı 2012 senesi mart 15-ten başlay.