“Yaşlar Şurası” talaqağa çağıra

25 Oktâbr 2011

Bu aqta parknı ğayrıdan tiklev leyhasınıñ reberi, gençlerniñ “Yaşlar Şurası” teşkilâtınıñ azası Dilâver Akiyev bildirdi.

“Bir qaç aydan berli gençlerniñ “Yaşlar şurası” cemaat teşkilâtınıñ teşebbüsi ile Biyuk-Onlar qasabasında medeniyet ve istraat bağçasını ğayrıdan tiklev işleri alıp barıla. Oktâbrskiy köy şurası yaşlarnıñ bu yönelişte beraber çalışmaq teklifini qabul etti ve köy şurasınıñ icra komitet ive teşkilâtımız arasında añlaşma imzalandı “, – dedi D. Akiyev.

Añlaşma imzalanğan soñ “Yaşlar şurası”nıñ azaları köy sakinleriniñ toplaşuvlarında çıqışta bulunıp, bağçanı tamirlev ğayesini ögge sürdiler. Qasaba sakinleri bu ğayeni maqullep, bu işlerge qoşulmaq istegini bildirdiler. Bağçanı tiklev leyhası UNITER leyhası çerçivesinde Amerika Qoşma Ştatları Halqara inkişaf boyunca agentliginiñ maddiy yardımı ile amelge keçirilmekte.

Şunı da qayd etmeli ki, qasaba şurası, yerli iş adamları ve bunıñ kibi sakinler de leyhanıñ kerçekleşmesine maliyeviy destek de kostereler. Leyha reberiniñ bildirgenine köre, qasabada 11 biñ insan yaşay. Qasabagnıñ Baş planına köre merkezde 4 gektar meydanda bağça yerleşken. Amma çoq yıllardan berli buña kimse qulaq asmağanı, baqmağanı neticesinde bağça püsür taşlanğan yerge çevirilgen. 2011 senesiniñ baarinde yerli akimiyet bağçanı tertipke ketirmek niyetinde bir-eki işlerni yapqan, terek de oturtqan kibi oldı. Lâkin bu areket bir kerelik olıp, közge körüngen bir netice bermedi.

Qasaba ve yaqınlarda yerleşken köy sakinlerine, olarnıñ balalarına raatlanmaq-eglenmek içün yer yoqtır. Gençlerniñ sportnen oğraşmaları içün de şarait yoq.. ” “Yaşlar Şurası” Biyuk Onlar qasabası ve musafirleri içün abadan, sport ve oyun meydançıqları olğan bağçada raatlanmaq ve eglenmek içün şarait yartamaqnı öglerine vazife olaraq qoydılar”, – haber ete
Onıñ bergen malümatına köre al-azırda bağçağa suv ağları ve elektrik ışıqlarını keçirüv işleri kete. Oktâbr 29 künü ise talaqa ötkerilip, qasaba sakinleriniñ ve bu işke qoşulmağa istegenlerniñ iştirakinde bağçada çeçek ve terekler oturtılacaq.

Ayder Acimambetov