Cağlıqnen qal bağça, meraba mektep!

09 Iyün 2011

Mekteplerde “Sonki çañ” tedbirlerinen beraberlikte balalar bağçalarındada ve mektepler yanındaki oquvğa azırlav gruppalarda “Sağlıqnen qal bağça, meraba mektep!” tedbirleri keçti.

Qırımda 469 bala bağçası bar (şeerlerde – 234, köylerde – 235).
Bu bağçalarda 2245 gruppa bar.
Olardan:
– 410 bağça – rus tilli;
– 3 bağça – ukrain tilli;
– 56 bağça – eki ve üç tilli sayıla. (87 gruppa – ukrain tilli, 23 gruppa – qırımtatar tilli. Bu 23 milliy gruppağa 350 qırımtatar balaçığı bara.)
Eki levha iş bu bağça tedbirlerinden.

Avdetimizniñ ilk yılları Aqmescitteki balalar bağçalarında terbiye qırımtatar tilinde alıp barılğan birinci gruppa № 54 “Ölenönok” bala – bağçasında açıldı. 20 seneden ziyade faaliyet köstergen milliy gruppanıñ ayatında bayağı deñişmeler, çeşit adiseler yüz berdi. Adet üzre yaznıñ ilk künleri bağçada “Sağlıqnen qal bağça” tedbiri keçirilip, terbiyeci ve kencetaylar nevbetteki mezunlarğa aq yol dep olarnı mektepke ozğaralar. Aqmescitteki № 54 “Ölenönok” bala – bağçasında keçirilgen “Sağlıqnen qal bağça” tedbiri kencetaylarnıñ tantanalı çıqışınen başlandı. Klassik, zemaneviy ve qırımtatar milliy oyunlarını icra etken balaçıqlar bayramğa kelgen ana-baba, ve cemaat teşkilâtlarnıñ vekillerini unutılmaycaq duyğular bağışlağan çıqışlarınen ğayet quvandırlar. Endi 17 yıldan berli milliy gruppanıñ terbiyecisi olğan Gülçere Akiyeva ana tilimizniñ inkişafına emiyet berip bağçağa yardım qolunı uzatqan teşkilâtlarğa teşekkür bildirdi. O milliy gruppanıñ ayatınen “Maarifçi” birleşmesi meraqlanğanını, zarur kitaplarnen taminlep, sponsorlarnı celp etkenini, Milletlerara munasebetler ve sürgün olunğan grajdanlarnıñ cumhuriyet komitetini daima diqqatini bağçalarğa celp etkenini ve olar tarafından yañı mebel, masa, dolaf, televizor, muzıka merkezi ve diger zarur eşyalar alınğanını, daa KRİPPO erkânındaki mektepkece terbiye bölügi usuliy yardım köstergenini –minnetdarlıqnen qayd etti, ve bu tedbirni azırlanuvına isse qoşqan Qırımtatar sanat müzeyiniñ hadimi

Mayye Abdulganiyevağa balaçıqlarğa yazğan şiirçikler ve yapqan tercimesi içün de teşekkür bildirdi.

Kencetaylarımız bağçadan ketken soñ özlerini çeşit müitte serbest sezsinler dep terbiyeviy – oqutuv protsess parallel olaraq üç tilde alıp barıla. Bayramda qırımtatar, ukrain ve rus tilinde icra etilgen şiir, yırlar balaçıqlar serbest üç tilde laf etkenlerini kösterdi. “Sağlıqnen qal bağça ve meraba mekteb!” mevzusında icra etilgen şiirler ve ana tilimizge kösterilgen sayğı şu künü iç kimni pervazsız qaldırmadı.

Şeñ numayış azırlağan terbiyeci, muzıka rehberi, oyun ocası, bağça müdiri ve diger hadimlerge teşekkür bildirip, “Maarifçi” birleşmesinde revizion komissiyanıñ başı ve QYUŞ deputatı Safure Kacametovanıñ yardımcısı Beyye İlyasova, “Maarifçi” azası Vade Kazakova bağçanen sağlıqlaşqan er balaçıqqa ana tilimizde çıqqan 15 daneden ibaret masallar kitaplarını lâle bantlarnen bağlap, er bir balağa ediye ettiler.

Beyye oca tedbirde bulunğan ana-babalarğa muraacat etip şu künü milliy gruppanıñ mezunı olğan kencetaylarnı milliy sınıfqa bermelerini tevsiye etti, çünki milliy tasil sistemamıznıñ tiklenüvindeki birinci basamaq milliy gruppadır. Onda terbiye alğan balaçıqlar, ekinci basamaq – milliy sınıfqa barsalar, milliy tasilimizni tiklep başladıq demektir.

Bayramda olğan çıqışlardan ruhlanğan bağça müdiri Alla İvanovna Єrmolova: “…milliy gruppağa üç yaşından – altı yaşınace balalar qatnaylar. Bağçada böyle qarışıq gruppa yekâne qırımtatar tilli gruppadır. Aslı da bağçada kencetaylar, orta yaşlı ve mektepke azırlav gruppası olmalı. Böyle gruppalar episi rus tilli, tek qırımtatar gruppası qarışıq”, – dedi. O qayd etkenine köre – milliy gruppağa balalarını bermege istegenlerniñ sayısı çoq, amma bu mesele bağça binası ufaq olğanı ve gruppa açmaq içün oda yetişmegenine bağlıdır.

Tedbirge kelgen er bir insannı çıqışlarınen hoşnut etken kencetaylar terbiyeci ve ana- babalar komiteti tarafından azırlanğan bahşışlarnı alıp, öz gruppasına qayttılar. Milliy gruppağa qatnağan 26 baladan 8 bala mezun oldı. Olar tuvğan bağçasınen sağlıqlaşıp mektepke yol alacaqlar.

Ayni böyle tedbir mühbirimiz Lenera Kezlevli bildirgenine köre, mayıs 28-de Kezlev şeeriniñ İsmail-bey qasabasında yerleşken milliy mektepte olıp keçti. Bir yıl devamında cumaertesi künleri azırlav kurslarına qatnağan 28 kencetay bala mektep ayatınen daa yaqın tanış oldılar. Balaçıqlar yıl devamında şiirler ezberlep, şeñ yırlar yırlap, milliy oyunlarımıznı oynamağa ögrendiler. Bayramğa er bir bala dülber milliy urbalarnı kiyip keldi ve er biriniñ ellerinde kök bayraçıqlarımız yelpirey edi. Tedbirde çeşit fenlerden qısqa ders taqdim etildi. Talebeler avesnen vazifelerni becerdiler ve musafirler tarafından alğışlar qazandılar. Merasimni “Küneşçik” ve “Sevinç” oyun ansambllerniñ çıqışları da yaraştırdı. Sözge mektep müdiri Nazim oca Aşurov çıqıp, balalarğa muvafaqiyetler tiledi ve bahşışlarnen quvandırdı. Tedbirniñ soñunda birinci sınıftan ekinci sınıfqa keçken talebeler, ana-babalarnı öz balalarını milliy mektepke bermege davet ettiler.

Bu merasimni teşkil etken azırlav gruppasınıñ terbiyecisi Rimma oca Gafarovağa mektep ocaları qol tuttı. Olar arasında Zekiye Ablâzimova, Venera Boyarşina, Eleonora Abkaimova, Gülşide Suinova, Elvira İbragimova, Dilâra Seitosmanova ve ayrıca Kezlev maarifçileriniñ başı Gülnara oca Adilşayevanı isselerini qayd etmeli.

Endi çoq yıllar devamında mektepke yerli iş adamı, cümert ve alçaqgöñülli insan Üsein Kaişev maddiy yardım ete. Bu sefer de o çette qalmay, yardım qolunı uzattı. Ocalar em de ana-babalar oña teşekkürler bildirip tutqan işlerinde muvafaqiyetler tilediler.

Meraqlı ve sıcaq müitte keçken bu tedbirni tesiri olur dep ümüt etemiz ve bu kencetaylar, inşalla, 1 sentâbr künü mektep azbarında diger talebeler arasına qoşular.     BİLGİ MEKÂNINA OĞURLI YOLLAR!