Volodımır Zelenskıy iftarğa qatıldı

14 March 2025

2023 senesinden itibaren ananeviy olğan Ukraina prezidenti Volodımır Zelenskıynen iftar saban ayınıñ 13-nde Kıyivde olıp keçti, musulman ve qırımtatar arbiy hızmetçileri, Qırımtatar Milliy Meclisiniñ vekilleri, diplomatlar, din adamları ve ukrain yüksek memurlarını birleştirdi.

Öz çıqışında Volodımır Zelenskıy qayd etti ki, Ukrainada umumiy iftar ananesi, ukrain musulman cemiyetine ve Ramazan bayramını qayd etken bütün insanlarğa ürmet ve minnetdarlıq ifadesidir.

“Bu sene Ramadan vaqtında bizim diplomatik ğayretlerimiz, ortaqlarımıznıñ barışıqnı yaqınlaştırmaq ğayretleri yer aldı. Ukraina ve Amerika diplomatik vekilleriniñ pek muvafaqiyetli körüşüvi, kerçekten de, muzakere meydanını bergen musulman memleketinde, olıp keçti. Ve böyle ola bile – Amerika Rusiyeniñ üzerinde basqı yapsa – Ramadan vaqtında barışıq içün küçlü diplomatik adımlar atmağa, cenkni kerçekten toqtatmağa ve telükesizlikni temin etmek planını qurmağa imkân peyda ola bilir”, – dedi Prezident.

İftarnı Ukraina Prezidentiniñ Qırım Muhtar Cumhuriyetindeki Temsilciligi ve Qırım Musulmanları Diniy İdaresi teşkil ettiler.

İftarda bulunğanlar arasında Prezident Ofisiniñ reberiniñ muavini Olena Kovalska, RNBO kâtibi Oleksandr Lıtvınenko, Bİİniñ yolbaşçısı Kırılo Budanov, qırımtatar halqınıñ lideri Mustafa Cemilev, Meclisniñ reisi Refat Çubarov, Ukraina Prezidentiniñ Qırım Muhtar Cumhuriyetindeki Daimiy Temsilcisi Olğa Kurışko ve digerleri bar edi. İftarda Türkiye ticaret naziri Ömer Bolat ve Türkiye köy hocalığı ve orman hocalığı naziri İbragim Yumaklı ve daa 15 memleketniñ elçileri iştirak etti – Azerbaycan, Mısır, İndoneziya, Qırğızistan, Liviya, Pakistan, Cenübiy Afrika, Tacikistan, Türkiye, Turkmenistan, Özbekistan, Qatar, Cezair, İraq, Qazahistan ve Sudan.

Volodımır Zelenskıy memleketimizni istilâcıdan qorçalap, ruh ve birlik quvetini numayış etken ukrain arbiylerine mukâfatlar berdi, şu cümleden, elâk olğan qırımtatar askeriniñ qorantasına “Altın Yıldız” nişanını berip, Ukraina Qaramanı unvanını berdi.

Tedbirniñ hususiy qısmı, Rusiye işğalcileri tarafından Ukraina diniy mirasınıñ yoq etilmesine bağışlanğan “Al-İnsan” (“İnsan”) sergisiniñ taqdim etilmesidir. Sergi, 600-den çoq diniy bina zarar körgenini ya da yoq etilgenini qayd etti, olarnıñ arasında ücümler neticesinde zarar körgen Bahmut, Mariupol ve Kıyivdeki camiler ve “restavratsiya” şeklinde viran etilgen Bağçasaraydaki Büyük Han Cami de bar edi.

Foto: Ukraina Prezidentiniñ Qırım Muhtar Cumhuriyetindeki Temsilciligi