Uquq qorçalayıcılar ağır hasta olğan Tofik Abdulgaziyevni azat etilmeege talap eteler

23 Iyül 2024

Yedi teşkilâtnıñ uquq qorçalayıcıları Rusiye Federatsiyasını 12 senege maküm etilgen qırımtatar faalcisi Tofik Abdulgaziyevni azat etmege çağıralar. Siyasiy mabüsniñ soñki yedi ayı qanunsız apis şaraitinde hronik hastalıqları sebebinden pek ağır keçe.

ZMINA İnsan aqları merkezi bu aqqında haber berdi.

Böylece, ZMINA, Vatandaş serbestligi merkezi, İnsan aqları içün Ukraina Helsinki birligi, “Qırım” insan aqları evi” cemaat birligi, “Diia” uquq qorçalayıcı merkezi, Kremlniñ siyasiy mabüslerniñ tuvğanları birligi ve Qırım uquq qorçalayıcı gruppası Rusiyeni şunı yapmağa çağıralar:

• Abdulaziyevniñ ağır sağlıq vaziyeti sebebinden ve Qırım, başqa VİET ve Rusiye Federatsiyasınıñ toprağında qanunsız tutulğan başqa siyasiy mabüslerni azat etmege;
• Rusiyeniñ cinaiy qanunlarını VİETda qullanmağa toqtamağa;
• siyasiy nazar noqtaları, jurnalistika, faaliyet ve diniy baqışları sebebinden insanlarnı taqip etmege toqtamağa.

Uquq qorçalayıcılar Ukrainanı şunı da çağıralar:

• Abdulgaziyevni deñişim cedvellerine kirsetmege ve siyasiy mabüsniñ azat etilmesini faal sürette qoltutmağa;
• tutulğan vatandaşlarnı azat etmek içün semereli bir mehanizmni işlep çıqarmağa ve olarnıñ qaytarıluvı meselesini qoltutmağa;
• Kremlniñ mabüsleriniñ qorantalarına semereli destek köstermege ve Rusiye Federatsiyasınıñ istilâsı neticesinde azatlıqtan marum etilgen insanlarnıñ tanılması mehanizmini eyileştirmege.

Bundan da ğayrı, uquq qorçalayıcı teşkilâtlar halqara toplulıqqa muracaat eteler:

• Rusiye Federatsiyasınıñ insan aqları vekâletlisi Tetâna Moskalkovağa muracaat etip, Abdulgaziyevniñ ağır sağlıq vaziyeti sebebinden apishaneden azat etilmesini talap etmege;
• vatandaşlarnıñ azat etilüvi ya da tutulması esnasında arabıştırıcılıq yapmağa;
• Ukrainanıñ bütün VİET, şu cümleden Qırımnıñ azat etilmesine er taraflama qol tutmağa;
• Abdulaziyevge ve tevqif etilgen bütün vatandaşlarğa nisbeten sert ve insaniyetsiz munasebette qabaatlı olğanlarğa qarşı şahsiy sanktsiyalarnı kirsetmege;
• Ukrainağa qarşı cenkniñ maliye etilmesini teminlegen Rusiye iqtisadiyatınıñ çeşit saalarına qarşı eñ semereli saalı sanktsiyalarnı kirsetmege;
• Rusiye Federatsiyasına mevcut sıñırlavlarnı keçmege imkân bergen dünyanıñ çeşit memleketlerinden iqtisadiy subyektlerine qarşı sanktsiyalarnı kirsetmege;
• Ukrainağa halqara seviyede tanılğan sıñırları içinde topraqlarnıñ işğalden azat etilmesini temin etmek içün er taraflama destek köstermege.