Ukraina yarımadanı qaytarmadan evel Qırım körpüsi viran etilmeli – Cemilev

21 Sentâbr 2022

Qırım köprüsini viran etmek – Ukrainanıñ qanunıy aqqıdır. Faqat bu, Qırımnıñ işğalden keri qaytarılmasından evel yapılmalı. Umumiy milliy telemarafonınıñ canlı yayınında qırımtatar halqınıñ lideri Mustafa Cemilev bunı bildirdi, dep “24. kanal” haber bere.

Mustafa Cemilev qayd etti ki, bu köpür qanunsız olaraq quruldı, bunıñ içün Ukrainanıñ onı viran etmek aqqında bar. Ukrainanıñ halqara teşkilâtlarnıñ narazılıqlarına baqmadan rusiye, işğal etilgen Qırımnı müstemleke etmek maqsadınen bu köpürni qurdı. Bu köpür vastasınen rusiye çoq asker ve tehnika ketire edi ve bunı yapmağa devam ete. Qırımtatar halqınıñ lideri qayd etti ki, tolu miqyaslı tecavuz başlağandan soñ bu, işğalcilerge Qırmıdan qıtaviy Ukrainanı ateş astına ketirmege imkân berdi. 

Bundan ğayrı, quvetlerni Qırımğa ketirüv vastasınen rusiye Herson ve Zaporijjâ vilâyetlerini zapt etmege başlaya bildi. Cemilev köpürniñ viran etilmesini Ukrainanıñ qanuniy aqqı olaraq tanıdı.

Qırımtatar halqınıñ lideri bildirdi ki, bazı ukrainalılar köpürniñ viran etilmesinden soñ işğalcilerniñ ve rus köçip kelgenleriniñ  yarımadadan çıqamaycaqlarından, bunıñ da meselelerni yarata bileceginden qorqalar, çünkü adetinde “köşede tutlğan sıçavullar muqavemet köstereler”.