Siyasiy mabüs Seyran Saliyevni ŞİZOğa yañıdan yolladılar

24 Iyül 2024

“Hizb ut-Tahrir davası”nıñ Bağçasaraynıñ ekinci gruppasınıñ mabüsi, vatandaş jurnalisti Seyran Saliyev kene daa sert ceza şartlarına yollanıldı. ZMINA uquq qorçalayıcı merkezi bunı bildirdi.

Bu seneniñ başından berli adamnı bir qaç kere ceza izolâtorına (ŞİZO) yollay ediler. Er seferinde “urba şeklini bozğanı” içün 15 kün apis cezasını çeke edi. Bir qaç sefer ŞİZOğa yollanğan adam müstemlekede “ağır cinayetçi” olaraq tanıla.

Uquq qorçalayıcı, Kreml mabüsiniñ apayı Mümine Saliyevanıñ aytqanına köre, sert şaraitte tutulğan insannıñ tuvğanlarınen bağları eksiltile. Şimdi aileniñ telefonlarını açmaq içün, aqay yañı arizalarnı yazmalı ve müstemlekeniñ memuriyetiniñ razılığını beklemeli. Bundan da ğayrı, oña endi senede üç degil de, eki sefer körüşmege ruhset berile.

2017 senesi orta küz ayında Rusiye quvetçileri Bağçasaraynıñ altı sakinini tuttılar. Bular Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametov ediler.