Siyasiy mabüs Ruslan Süleymanov ekimlerniñ areketsizligine şikâyet etti

10 Noyabr 2023

14 senege maküm etilgen içtimaiy jurnalist Ruslan Süleymanov, Novoçerkasktaki 3. SİZOda ekimlerniñ areketsizligi ve tutuv şartlarına şikâyet etti.

Taqiqat izolâtorında advokat Svitlana Oleksenko siyasiy mabüsnen körüşken soñ “Qırım birdemligi”ne bu aqqında haber berdi, dep Suspilne Qırım bildirdi.

Onıñ sözlerine köre, qalp hastalığı sebebinden siyasiy mabüs ekimlerni çoq kere çağırdı, amma olar tek bir kere onı ziyaret ettiler ve Leonurus ve Glitsin almağa tevsiye ettiler. Amma adam olarnı red etti. Oña spirtsiz ilâç bermek ricasına ekimler, böylelerniñ mevcut olmayanını bildirdiler.

Bundan ğayrı, kamerada yüksek dımlılıq bar. Ekim ayınıñ 16-sında qızdıruv sisteması çalışmadan evel Süleymanov kiyinip yuqlay edi. Ekim ayınıñ 5-inden berli bir kişilik kamerasına ketirilgen onıñ yataq çamaşırını deñişmediler.

“Hizb ut-Tahrir davası”nıñ Ekinci Aqmescit gruppasınıñ iştirakçisiniñ imayecisi qayd etti ki, çamaşırları yıqamaq mümkün degil, çünki qurutıcı maşna içün yer yoq. Bundan ğayrı, siyasiy mabüs tükândan gigyena eşyalarını alamaz.

Bundan başqa, videokamera vastasınen olarnı er vaqıt nezaret eteler. Kreml esiri, ne içün onı bir kişilik kamerağa ketirgenlerini sorap, izolâtornıñ işçileri şunı cevap berdiler: “Sen mahsus sicildesiñ. Ketmeseñ, mecbur etermiz”. Eyyetniñ ne içün maqbul qarar bergenini soradı, amma cevap alâ daa almadı.

Süleymanovnıñ advokatı qoştı ki, meyva ve sebze yoq, içilir suv tek suv musluğından filtirlengen bar.

Şu anda qırımtatar adamı anası ve apayına telefon ete bildi, amma uzun devamlı körüşüvler yasaqltır. Qırımdan siyasiy mabüsni qısqa müddetli körmek içün ailesi çoq vaqıt kerek.