Rusiye makemesi, epis etilgen Leniye Umerovanı SİZOda qaldırdı

13 Sentâbr 2023

Moskva şeker makemesi, Rusiyeniñ casuslıqta qabaatlağanı qırımtatar ve Ukraina vatandaşı olğan Leniye Umerovanı ekim ayınıñ 4-üne qadar SİZOda qaldırdı. «SOTAvision» Telegram kanalı bu aqqında haber berdi, dep Qırım.Aqiqat bildirdi.

Bildirmege köre, oturış qapalı rejimde keçirildi. Makemeci, protokol videosını çıqarmağa yasaq etti. Umerova özü video alâqası vastasınen oturışta iştirak etmege red etti.

Qırımtatar qızınıñ qorçalayıcısı Olha Dinzeniñ sözlerine köre, SİZOda tek advokatlar Umerovanı ziyaret eteler. Aqrabaları tek telefon ete ve video vastasınen laf ete bilirler.

Keçken sene ilk qış ayında Leniye Umerova Kıyivden Qırımğa ketecek edi, çünki banası onkologiya hastalığını çeke. O, gürci-rus sıñırını keçirken soñ rejim zonası qaidelerini bozğanı içün rus quvetçileri onı tuttılar.