Rusiye Federatsiyasınıñ müstemlekesizleştirilmesi Rusiyeniñ esir etilgen halqlarınıñ aqlarını ğayrıdan tikleycek – Refat Çubarov

27 Sentâbr 2024

Rusiyeniñ müstemlekesizleştirilmesi – Rusiyeniñ esir etilgen halqlarınıñ öz topraqlarında aqlarını ğayrıdan tiklemege imkân berecek tek ceryandır.

Böyle bir beyanatnı Meclisniñ reisi Refat Çubarov “Ukraina tarafından Dağıstannıñ işğal etilgen topraq olaraq tanılması. “Dağıstannı Rusiye işğalinden qurtaruv eyyeti”niñ teşkil etilmesi”. QIRIM.News bu aqqında haber etti.

Meclisniñ reisiniñ aytqanına köre, Rusiyeniñ müstemlekesizleştirilmesi ve esir etilgen halqlarnıñ aqları, şu cümleden öz-özüni belgilev aqqı, cenklerniñ tekrarlanmaması içün kefalet olacaq.

“Cenkten soñ adaletli barışıq aqqında aytqanda, Rusiyeniñ esir etilgen halqlarınıñ öz topraqlarında öz-özüni idare etüv aqqını körmemezlikke urıp olamaymız ve körmemezlikke urmamalımız. Qaysı şekilde, nasıl statusta, ya da belki de mustaqil, suveren devlet şeklinde – Rusiyeniñ şimdiki sıñırlarında yaşağan halqlar qarar alacaqlar”, – dedi Çubarov.

O, konferentsiyanıñ iştirakçilerine Yuqarı Şurada Rusiyeniñ esir etilgen halqlarına qol tutuv aqqında qabul etilgen vesiqalarnı hatırlattı.

Olarnıñ arasında Ukraina Yuqarı Şurasınıñ halqara toplulıqqa muracaatı ve rusiyeniñ halqlarınıñ öz-özüni belgilev aqqına qovtutuvı aqqında 2022 senesi orta küz ayınıñ 6-nda qabul etilgen qarar bar. 2022 senesi orta küz ayınıñ 18-inde qabul etilgen, rusiyeniñ İçkeriya Çeçen cumhuriyetine qarşı silâlı tecavuzını takbih etici qarar da bar. Ve üçüncisi – 2024 senesi kiçik aynıñ 23-ünde qabul etilgen, inguş halqınıñ mustaqil suveren milliy devletini teşkil etüv aqqınıñ tanınaması ve rusiyeniñ inguşlarğa qarşı cinayetleriniñ takbih etilmesi ve İnguşetiyanıñ topraq bütünliginiñ yañıdan tiklenmesi aqqındadır.

Meclisniñ reisi, Ukrainanıñ Rusiye Federatsiyasınıñ esir etilgen halqlarına qol tutmaq içün elinden kelgenini yapqanını ilâve etip,  bütün tamır halqları öz-özüni belgilev aqqını amelge keçirip, mustaqil Dağıstan şekline añlaşacaq taqdirde Dağıstannıñ mustaqil devlet ola bilecegine işanğanını ifadeledi.