Qırımtatar halqınıñ hatıra tarihları taqvimini azırlama işi başlandı

14 Iyül 2023

2023 senesi oraq ayının 13-ünde Qırımtatar Milliy Meclisiniñ ofisinde Qırımtatar halqınıñ hatıra tarihları taqvimini azırlama leyhası müzakere etildi.

 «KKSTS«Кüreş» HFnıñ inkişaf müdiri İbrahim SULEYMANOV, Qırımtatar halqınıñ hatıra tarihları taqviminen bağlı maqsatları, vazifeleri, mümkün olacaq tizilişi ve başqa hususiyelerini taqdim etti.

Muzakereniñ iştirakçileri, olar aralarında Günlara ABDULLAYEVA, Mustafa AMETOV, Elvin KADIROV, Elvina SEİTBULLAYEVA, Ayder SEİTOSMANOV, Abmecit SULEYMANOV, Leylâ CAKSİM ve Refat ÇUBAROV, Qırımtatar halqınıñ hatıra tarihları taqviminiñ kontseptsiyasınıñ müellifi İbrahim SULEYMANOVnen beraber Taqvimniñ kontseptsiya leyhasını tafsilâtlıca muzakere ettiler ve onıñ yaratılmasına dair öz tevsiyelerini teklif ettiler.

Qırımtatar Milliy Meclisiniñ başı Refat Çubarov, 2021 senesi Ukraina Nazirler Kabineti tarafından tasdıqlanğan Qırımtatar tiliniñ inkişaf kontseptsiyasında Hatıra tarihları taqvimini yaratmaq kerekligini qayd etti.

“Qırımtatar Milliy Meclisiniñ çağıruvlarını duyğan, Hatıra tarihları taqvimi leyhasını azırlağan ve qorçalağan «KKSTS«Кüreş» HFa teşekkür bildiremiz. Añlaşılır ki, çoq beklengen taqvimniñ dünya yüzüni eñ yaqın kelecekte körmesi içün beraber çalışamız”.

Muzakereniñ soñunda «KKSTS«Кüreş» HFnıñ inkişaf müdiri İbrahim Suleymanov, muzakereni teşkil etkeni içün Qırımtatar Milliy Meclisine, Qırımtatar halqınıñ hatıra tarihları taqviminiñ kelecek yaratılması ceryanında köz öğünde alınacaq faydalı ve meraqlı tekliflerini bildirgenleri içün iştirakçilerine teşekkür bildirdi.