Qırımnı azat etüv – tamır halqınıñ ayat meselesidir, – Cemilev

24 Avgust 2023

Qırımnı azat etüv meselesi, tamır halqınıñ ayat meselesidir, dep qırımtatarlarnıñ lideri ve halq mebusı Mustafa Cemilev qayd etti.

“Yaqın kelecekte bütün işğal etilgen topraqlarımıznı, şu cümleden Qırım, azat etme istiqbali peyda oldı. Eñ tez tarzda azat etüv, Qırımnıñ tamır halqı – qırımtatarlar – içün soñ derecede müimdir, çünki olar içün bu ya kelecek inkişaf, ya da tamır milleti olaraq tamamınen yoq oluv meselesidir”, – dep Çarşenbe künü Kıyivde Qırım Platformasınıñ 3. sammitinde Cemilev ayttı. İnterfaks bu aqqında haber berdi.

Bundan ğayrı, Cemilev qayd etti ki, rusiyenen cenk bitirmek içün ukrain cemaatı öz topraqlarını, şu cümleden Qırım, asla feda etmeycek.

“Biz yañlışça tüşünemiz ki, tecavuzcı ve terrorcınıñ qanunsız şartlarını qanaatlendirip, cenk çatışmasınıñ tarqatılmasını evelden yoq etmek ve uzun devamlı barışı temin etmek mümkün”, – dep Cemilev ayttı.

O hatırlattı ki, farqlı qıymetlendirmelerge köre Rusiye Qırımnı işğal etken soñ yarımadağa deyerli million RF vatandaşı “köçti”, “rus işğalcileriniñ tesiri astında qırımtatarlarnıñ 10%-i ve onlarca biñ qavmiy ukrainalı ise Qırımdan çıqmağa mecbur oldı”.

Cemilev bunı da hata olaraq tanıy: qırımtatarlar yarımadağa qaytqan soñ (XX. asırnıñ 90. seneleriniñ başlanğıcı – ІF-U) Qırımda milliy-topraq muhtariyeti ğayrıdan tüzetilmedi. Aynı zamanda o qayd etti ki, haqlara vesiqalar ve Yuqarı Şuranıñ tasdıqlağanı qanunlar, bu hatanı çezmege imkân bereler.