Qırımda işğalciler Nazım Memetovnıñ evini tinttiler

23 Yanvar 2024

İşğal quvetçileri, TVKnıñ Qurultaynıñ vekillerini saylav başınıñ muavini Nazım Memetovnıñ evini tinttiler.

O, bunı “Qırım birdemligi”ne bildirdi, dep Suspilne Qırım haber berdi.

“Bugün hucur sesler ve davuşlar meni uyandırdı. Ve evimdeki ayaq patırdısı. Men ekinci qatta uyanam ve yabancılarnıñ ayaq patırdısı ve bir birine “Er şey yahşı! Kireyik!” dep bağırğanlarından uyandım. Olar odama kirdiler, yüzümni fenerden yarıqlattılar, tumam, özümni taqdim etmem, kiyinmemni ayttılar. Ve bu insanlar elbette balaqlava taqıp, silâ alıp, zırhlı yelek kiyingen ediler. Belki 12-15 adam edi”, — dep Memetov bildirdi.

O qayd etti ki, oña qarşı bedeniy basım etmediler, amma “quvet gruppası” özüni pek nezaketsiz ve arsız tuttı.

İşğalciler Memetovğa RF CQniñ 222. maddesiniñ 6. qısmına mücibi açılğan cinaiy dava çerçivesinde “Aqyar şeeriniñ Kıyiv rayon makemesi”niñ makemecisiniñ qararını oqudılar.

“Cinaiy dava açıldı. Maqbul operativ taqiqat işlerini yapalar. Ve makemeci, menim saip olğanım eki adresteki evlerni tintmege qarar berdi. Anda başa adres yazıldı. Kerçekten de bu, aynı saipliktir”, — dep Memetov añlattı.

Umumen tahminen 4 saat devamında evini tinte ediler. İşğalcilerniñ qanunsız areketleriniñ neticelerine köre Nazım Memetovnıñ cep telefonı ve laptopını alıp çıqardılar.

“Qaysı statusta bulunğanımnı soradım. Olar cevap berdiler ki, menim iç bir statusım yoq. Men ise bunı aytam: “Men qabaatlanğanımmı, şübelengenimmi, şaatımmı? Men qaysı statustam?”. Olar maña status bildirmediler. Olar ayttılar ki, makemeniñ qararıa esaslanıp, operativ taqiqat tedbirini keçireler. Ve meni bu qararnı imzalamağa mecbur ettiler. Amma men bu qararnıñ kopiyasını sorap, olar ise “Yoq, bunıñ kopiyası sizge berilmez”, dep ayttılar”, — dep qırımtatar adamı qayd etti.

Bundan başqa, o tüşüne ki, böyle areketler, 2014 senesi Qırım işğal etilgen soñ keçirilmege başlağan şu vaqialarnen razı olmağan bütün qırımtatarlarğa qarşı planlaştırılğan basımdır.

“Öz nazar noqtamdan red etmege mecbur etmeniñ zor olğanı bir yaştamdır. Ve eger nasıldır nazar noqtam olsa, men oña riayet ettim ve eterim! Böyle qorqutıcı areketlernen bu nazar noqtamdan red etmege mecbur etmek zor olur”, — dep Memetov hulâsa çıqardı.