Qırımda işğalciler askerlerge topraq berip, yerli ealini çıqaralar – Bariiev

06 Sentâbr 2024

_{Foto: Qırımtatar Maaliy Merkezi}

Qırımtatar Maaliy Merkeziniñ idare reisi, Qırımtatar Milliy Meclisiniñ azası Eskender Bariiev Rusiye işğalli akimiyetiniñ topraq damartılarını Rusiye askerleri içün ayırıp, Qırım üzerinde kontrolini pekitmek ıntıluvı aqqında bildirdi.

Onıñ sözlerine köre, işğalciler, Rusiye Mudafaa nazirliginen añlaşma tizip, Rusiyeniñ er angi bölgesinden cenk iştirakçilerine yarımadada topraq berilmesi aqqında ilân etti.

“Bu, daa çoq insanğa cenkke, cenk areketlerine çağırmaq içün lâyıq şartlar, hususan Qırımdaki topraqlar teklif eler. Aynı zamanda çoq balalı qorantalar ya da Rusiye istilâsına qol tutqan askerlerde ğayrı, qırımlılarnıñ topraq damartılarına irişimleri yoq”, – dep qayd etti Bariiev.

Bu siyaset yarımadanıñ demografik terkibiniñ küçlü deñiştirilmesiniñ daa büyük strategiyasınıñ bir qısmıdır, onıñ maqsadı yerli ealini sıqıştırmaq ve Rusiyeniñ arbiy bulunuvını quvetleştirmektir. Böyle bir qarar halqara uquqnıñ qaba bozuluvıdır ve Rusiyeniñ bölgede bulunmasını uzun müddetke pekitmek niyetini köstere, dep Qırımtatar Maaliy Merkezi haber etti.

Bariiev şunı da qayd etti ki, Qırım toprağına iddia etkenlerniñ arasında Ukrainağa qarşı cenkte iştirak etmeleri içün azat etilgen sabıq mabüsler de bar. O, cenkten qaytqan soñ yañı cinayetler yapqan cinayetçilerniñ misallerini ketirdi:

• Andriy Bıkov

1991 senesinden berli altı kere apiske alınğan edi, şu cümleden öldürüv sebebinden. “SVO” başlağanda, o “Z Storm”ğa kirdi. Esir alındı, soñra deñişim cedveline kirsetildi.

Öz tuvğan Kuzbasına qaytıp, 12 yaşındaki bir qıznı öldürdi. Bıkov onı ağaçqa bağlap, namusını keçti, ştanlarnen boğdı ve cesedini baqılmağan bir binanıñ quyusına qoyıp, anda saqladı.

• İvan Rossomahiv

2020 senesi öldürüv ve hırsızlıq sebebinden 14 senege maküm etildi. Soñra ukrainlerni öldürmek içün azat etildi. 2023 senesi mart ayında evge qayttı. 85 yaşındaki pensioner qadınnı zorlap öldürdi. 23 sene apis cezasını aldı, amma bir aftadan soñ onı kene cenkte iştirak etmesi içün azat ettiler.

• Oleksandr Tümakov

2016 senesi oğurlıq ve balanı öldürgeni içün 11 senege üküm etildi. 2022 senesiniñ soñunda “Vagner” cemaat teşkilâtına kirdi. Cenkten qaytqan soñ, çoq balalı anasını öldürdi ve cesedini maşinada yaqqan. Yedi senege üküm etildi.

Aynı zamanda Qırımnıñ işğalli akimiyeti qırımtatarlar ve ukrainlerge qarşı repressiyalarnı devam ete, olarnı sahte qabaatlavlar esasında onlarca sene apis cezasına mahküm ete ve yarımadadan qanunsız olaraq çıqara.