Qırımda “Azovstal”dan eki ukrain sıñırcısı maküm etildi

10 Iyün 2024

_{Fotoresim: mvs.gov.ua}

İşğalli “Qırım Yuqarı makemesi”, “Azovstal”dan eki ukrain sıñırcısını 17 senege maküm etti. 2018 senesi İvan Tereşçenko ve Vasıl Dmıtruk “Nord” gemisini tuttılar.

Qırım uquq qorçalayıcı gruppasınıñ haber bergeni kibi, “makemeci” Sergey Poğrebnâk üküm çıqardı. Ukrain sıñırcıları müddetiniñ birinci 3 senesini apishanede, qalğanını ise rus müstemlekesinde keçirmeliler.

Vasıl Dmıtruk – yalı qaravullı gemisiniñ kapitanı-leytenant, İvan Tereşçenko – yuqarı miçman ve sıñır gemisiniñ elektrik ve mehanikiy hızmetiniñ komandanı. 2018 senesi Ukraina Devlet sıñır hızmetiniñ gemisinde hızmet ettiler ve saban ayınıñ 25. künü Azaq deñizinde Rusiye Federatsiyasınıñ bayrağı astındaki “Nord” qırım balıqçı gemisini tuttılar. O zaman İvan Tereşçenko motorcı, Vasıl Dmıtruk ise geminiñ kapitanı ediler.

2022 senesi mayıs ayınıñ 16. kün komandanınıñ emrine köre “Azovstal”dan çıqqan soñ ekisi rus esirligine oğradılar.

Belli oldı ki, birinciden İvan Tereşçenkonı Olenivkağa, bundan soñ Ğorlivkağa yolladılar, birazdan Aqmescitteki 2. SİZOğa etap etildi. Eñ az 2023 senesi arman ayınıñ 31. kününden başlap Qırımda buluna.

Ekisini 2018 senesi Azaq deñizinde insan ve gemi hırsızlamağa qabaatladılar.

Belli oldı ki, 2018 senesi saban ayınıñ 25. künü Azaq deñizinde Ukraina Devlet sıñır hızmeti, Rusiyeniñ bayrağı astındaki balıqçı gemisini tuttı. Kıyiv tarafından qapatılğan işğal etilgen Keriçten “Nord” gemisi çıqarılğanı içün Qırım MC ve Aqyar şeeriniñ prokurorlığı, cinaiy dava açtı ve saban ayınıñ 30. künü ise ukrain makemesi gemini tevqif etti.

2018 senesi orta küz ayınıñ 30. künü “Nord”nıñ taqımı Qırımğa qayttı. İşğalciler bildirdiler ki, deñizcilerni Qırımda tutulğan “YAMK-0041” ve “YAOD 21-05” ukrain gemileriniñ taqımına deñiştirdiler.