“Qırım birdemligi” uquqçılarınıñ evine “E” Merkeziniñ hadimleri OMONnen keldiler

07 Noyabr 2024

_{Foto: Qırım birdemligi}

İşğalli Aşırıcılıqqa qarşılıq merkeziniñ hadimleri, “Qırım birdemligi” uquçıları Rustem Kâmilev ve Lilâ Gemeciniñ evine keldiler.

Advokat Edem Semedlâyev bu aqqında haber berdi, dep Suspilne Qırım bildirdi.

Tintüv makemeci Dolğopolovnıñ imzasınen Aqmescitniñ Kıyiv rayon makemesiniñ qararınen keçirildi. “Makeme” qararnı “Qırım içki işler naziri”niñ vazifesini vaqtınca ida etken Aleksey Dmitriyevniñ muracaatınen çıqarıldı. Uquqçılarnıñ bütün tehnika vastaları, şu cümleden işlerinde qullanğanları vastaları tutıp alındı. Rustem Kâmilevniñ evi tintilgen soñ onı Aqmescitteki Qırımnıñ Aqşırıcılıqqa qarşılıq merkezine alıp kettiler.

Tintüv vaqtında hadimler bütün aile azalarınıñ telefonlarını tutıp aldılar, soñra ise evden çıqmağa yasaq ettiler. Niyara, “qırımtatar davaları”nda belli olğan “E” Merkeziniñ hadimi Şambazovnıñ duşmanca tefsirleri aqqında da bildirdi, o, onıñ telefonını tutıp aldı ve qardaşını arbiy komissarlıqqa çağırıp, qorquzğan edi.

Quvetçiler Lilâ Gemeciniñ tasil yükseltüv şeadetnameleri, Cenübiy bölge arbiy makemesinden yedi mektüp, iş defterleri ve advokat statusınen bağlı vesiqalarnı aldılar.

“Advokatlarnıñ vesiqalarını qıdıra ediler. Vesiqalar, makemelerden kelgen mektüplerni de”, — dedi Lilâ Gemeci.